Pablo Prieto Perille xa é oficialmente presidente da Real Federación Galega de Fútbol (RFGF). Esta mañá tomou posesión nunha xuntanza de traballo na que estivo acompañado do seu equipo directivo e dos responsables das delegacións federativas. Unha xuntanza organizada no Balneario de Guitiriz e na que se está ultimando a planificación en todos os ámbitos de cara á temporada 26-27, segundo informan desde a propia federación.
Pablo Prieto agradeceu “a confianza, a implicación e o compromiso de toda a xunta directiva, dos delegados e de todos os traballadores da Federación”.
Aposta pola continuidade pero tamén “por seguir mellorando a prestación aos clubs” e garante que “imos manter o nivel das axudas e incluso abrir outras vías de cara ás vindeiras temporadas para facilitarlle o día o día aos clubs”.
Comeza así o ciclo 2026-2030 con Pablo Prieto á fronte da Real Federación Galega de Fútbol (RFGF), dando continuidade a un proxecto que comezou en xaneiro de 2025 e que agora xa está afrontando os retos que presenta a temporada 2026-2027.
Equipo directivo de Pablo Prieto na RFGF
Pablo Prieto preside un equipo directivo formado polos vicepresidentes Fernando Iglesias, José Manuel Fernández Cid, José Manuel Fernández Rodríguez, Carlos Méndez e desde hoxe tamén Manuel Lores, Carmelo Galiñanes na función de tesoureiro e como vogais Cristina Regueira, María González, Patricia Doval e Pili Costa. Todos eles acompañados polo secretario xeral Diego Batalla.
Abraham Yáñez en Ferrol, Manolo Corredoira na Coruña e A Costa, Manuel Castro “Vilachá” en Lugo, Silvia Cancela en Santiago, Raúl Rois en Ourense, Jaime Otero en Pontevedra e Borja Arca en Vigo forman o equipo de delegados federativos que son os que manteñen unha liña de traballo máis directa cos clubs.
Manolo García como presidente da Escola e do Comité de Adestradores, Julio Mougán como presidente do Comité Galego de Fútbol Sala, Jose Luis Chantrero á fronte da coordinación xeral, Juan Carlos García en licencias, Berta Blanco en contabilidade e Rafael Varela Pastrana recentemente nominado visecretario xeral forman parte tamén dun equipo federativo formado por 46 traballadores.
Recoñecemento a Javier García
Javier García exerceu de vicepresidente pola Delegación de Santiago desde a chegada de Rafael Louzán á presidencia. Pablo Prieto seguiu contando con el e a intención era que se mantivese no equipo, pero motivos persoais fixeron que o propio Javier García solicitase a súa baixa como directivo da RFGF. “Seguirei colaborando no que se considere, pero non podo adicarlle o tempo que se merece a un cargo desta magnitude”, sinalou García.
Os seus compañeiros de directiva, encabezados polo presidente, Pablo Prieto, trasladáronlle o seu agradecemento cunha placa conmemorativa e moi agarimosa e cunha camiseta oficial da selección galega co seu nome”.
