Ourense está de estrea no futsal feminino cun novo campionato, o I Torneo Internacional de Fútbol Sala Feminino “Caldaria-Concello de Cartelle”. Nesta competición participarán dous equipos galegos, o Cidade de As Burgas e o Poio Pescamar, ademais do AD Alcorcón e o Sport Lisboa e Benfica.
A presentación do mesmo tivo lugar este luns, 19 de xullo, no Pazo Provincial, coa participación do presidente da Deputación, Manuel Baltar; o alcalde de Cartelle, Jaime Sousa; o organizador do evento, José Ángel Baliñas “Taffa”, e o representante da Secretaría Xeral para o Deporte da Xunta de Galicia, Carlos Bericat. O torneo de futsal disputarase no pavillón Piño Vilachá, de Outomuro (Cartelle) os días 4 e 5 de setembro.
Manuel Baltar destaca o deporte ourensán
Manuel Baltar destacou que se trata “dun evento da máxima importancia no ámbito deportivo na nosa provincia no que atinxe ao futsal feminino”, e remarcou que hai anos “puxemos en marcha un plan de ecosistema de turismo deportivo que vén dando excelentes resultados, non só como escenario, senón que ao longo do tempo deu importantes mostras de triunfo deportivo”.
O mandatario destaca o deporte feminino, “pois ás tres xogadoras que hoxe nos acompañan son un exemplo, e agora que se van a celebrar os Xogos Olímpicos temos a Támara Echegoyen que en vela, en 2012, foi medalla de ouro en Londres; e tamén temos a Raquel Carrera, que no ámbito do baloncesto está convocada pola Selección Española, e destaca o recente triunfo de Leticia Gil, unha atleta de Valdeorras, campioa nacional de salto de lonxitude”.
Baltar engadiu a presentación en Manzaneda da “Vuelta a España” feminina, “que terá tres etapas na provincia de Ourense. En definitiva, toda unha aposta polo deporte feminino que ten neste torneo unha referencia europea que converterá a Cartelle na capital do fútbol sala feminino”.
Segundo informa a Deputación de Ourense, Taffa agradeceu o apoio institucional para levar a cabo o evento de futsal e destacou a importancia dos equipos participantes, “situados entre os mellores de Europa”, mentres que Carlos Bericat salientou a importancia desta alianza de cooperación Deputación-Xunta “para seguir potenciando o deporte feminino na provincia de Ourense”.
O alcalde de Cartelle valorou este evento como “o mellor torneo de España e posiblemente de Europa” de futsal, agradecendo a implicación do presidente Baltar “neste proxecto, así como todo o apoio que da ao rural ourensán”, afirmou Jaime Sousa.
O acto de presentación contou tamén coa asistencia das xogadoras de futsal Ana Rivera, do Poio Pescamar; Nerea Moldes, do Alcorcón FS, e Amelia Cobelas, do Cidade de As Burgas.
