A XXXVII Copa Deputación de Ourense de Atletismo reunirá a 250 deportistas das categorías Sub14 e Sub16 dos que cabe destacar a importante participación feminina con 154 mulleres inscritas que, xunto aos 96 homes participantes, protagonizarán este evento durante catro xornadas.
Haberá representación feminina de clubs como: Lucus Caixa Rural Galega, Asociación Deportiva Olimipa, ADAS Proinor, Atletismo Deza, Ourense Atletismo, Viguesa de Atletismo, AT. VIla de Cangas, Club Atletismo Narón, CA Millaraio, Atlética a Silva, Atletismo Noia, La Mochila del Deporte, Atletismo Samertolameu, EA Ben Cho Cho Shey, At. Rías Baixas, San Miguel de Marín, Marineda Atlético, SA do Trega, Triki Team, Franciscanos Lugo, Comesaña Sporting Club, SG Pontevedra ou CD La Purísima.
A presentación deste evento deportivo tivo lugar na pista de atletismo do Campus ourensá, acto no que participou o vicepresidente da Deputación, Rosendo Fernández; o xefe do servizo provincial de Deportes da Xunta, Manuel Pérez; o delegado da Federación Galega de Atletismo, Ángel Fidalgo; o xefe do servizo de Deportes do Campus, Rodrigo Alberte; e o vicepresidente primeiro da Federación Galega de Atletismo, Eladio Gómez.
Rosendo Fernández lembrou que, unha vez máis, “a Deputación de Ourense está co deporte, e neste caso co atletismo e con este evento que chega xa a súa 37ª edición”. Asemade, o vicepresidente da Deputación de Ourense dixo que a pesar das circunstancias “o deporte debe continuar, cumprindo tódolos protocolos” e sinalou que este tipo de competicións contribúen a que “os deportistas mozos manteñan a actividade física e se promovan hábitos de vida saudables”.
Esta Copa Deputación, organizada pola Federación Galega de Atletismo a través das súas delegacións en Ourense e Valdeorras, desenvolverase en catro xornadas que darán comezo o sábado, 26 de setembro, no Campus de Ourense. Continuará no Estadio de Calabagueiros, o 3 de outubro, coa segunda xornada. Posteriormente a competición volverá ao Campus de Ourense onde se celebrarán a terceira e a cuarta xornada da Copa, os días 17 e 24 de outubro, respectivamente.
As disciplinas atléticas en liza
A primeira xornada, prevista para o vindeiro sábado, 26 de setembro, comezará a partir das 10.30 horas e acollerá as seguintes probas para as categorías Sub14 e Sub16: 80 m., 100 m., 500 m., 1.000 m., 220 m. Valos, 300 m. Valos, Triplo e Peso. Consulta aquí a lista de deportistas inscrita.
A competición realizarase conforme ao protocolo Anti COVID-19 da Federación Galega de Atletismo e aprobado pola Secretaría Xeral para o Deporte da Xunta de Galicia. Celebrarase a porta pechada, só podendo acceder á instalación os atletas, xuíces e persoal de organización e un delegado e un adestrador (por ratio de 10 atletas) por Club. Neste sentido, Ángel Fidalgo dixo que “os rapaces só poderán acceder á instalación unha hora antes da súa competición e deberán abandonala inmediatamente despois desta”.
Ángel Fidalgo, delegado en Ourense da Federación Galega de Atletismo: “As rapazas só poderán acceder á instalación unha hora antes da súa competición e deberán abandonala inmediatamente despois desta”
Pola súa parte, Rodrigo Alberte agradeceu á Deputación, á Secretaría Xeral para o Deporte e á Federación Galega de Atletismo que nestes tempos de pandemia “teñan a iniciativa de levar adiante a proba da Copa Deputación” e asegurou que para a Universidade é “unha satisfacción que se desenvolvan iniciativas deste tipo que fan que o deporte retorne paulatinamente, sendo esta competición a segunda proba que se desenvolve aquí en período Covid”.
Rodrigo Alberte, xefe do servizo de Deportes do Campus de Ourense: “Agradezo á FGA que en tempos de pandemia teñan a iniciativa de levar adiante a proba da Copa Deputación”
E. Gómez, FGA: “Ourense estase a converter no epicentro do atletismo en Galicia”
Manuel Pérez desexou que esta competición “saía fenomenal e sexa un exemplo de que con tódalas medidas de seguridade e con tódalas precaucións pódese realizar deporte” e destacou o papel do atletismo na provincia de Ourense afirmando que “está moi ben considerado”.
Nesta mesma liña, Eladio Gómez sinalou que “Ourense estase a converter no epicentro do atletismo en Galicia” e que agora acollerá esta Copa Deputación de Ourense que é “unha proba xa emblemática, coñecida e recoñecida en toda Galicia, mostra dilo é que van a participar 27 clubs galegos e 6 da provincia de Ourense”, engadiu o vicepresidente primeiro da Federación Galega de Atletismo.
