Na nova imaxe do Ourense OnTime FSF faise un redeseño do escudo da entidade no que se incorpora unha flor de toxo sobre unha ponte romana. Hai tamén referencia ás augas termais, aos ríos e a bandeira galega. Fálase desde o club de que “o poder da resiliencia e da sensibilidade únense no noso novo corazón”. Hai nos elementos que a conforman a intención de que se recolla o simbolismo de cuestións como a xa citada resilencia, pero tamén a fachenda, a identidade, a fortaleza e o feminismo.
O Ourense OnTime FSF deu a coñece a súa nova imaxe nas redes sociais da entidade ourensá a través dun vídeo que explica a motivación da incorporación da chorima, desa flor de toxo. Nos cancelos nas redes súmanse tamén lemas como #100x100Toxo #florDeToxo.
Ver esta publicación en Instagram
Tal e como explican nesta publicación desde o Ourense OnTime FSF o que presentante vai máis aló “dunha simple imaxe. Presentamos un símbolo que latexa con forza, historia e verdadeira identidade. O noso novo escudo representa quen somos e cara a onde queremos ir. Mantemos as cores azuis que nos define, pero engadimos elementos que falan da nosa terra, a nosa cultura e a nosa esencia”.
A ponte romana, os ríos, as augas termais e o toxo
Explican que á imaxe súmaselle a ponte romana coma “unha testemuña silenciosa da nosa historia que nos veu nacer”. Outro dos elementos que se observan na nova imaxe son as augas termais e os ríos, coma “símbolo de vida, renovación e esperanza”.
A bandeira galega tamén ten presenza como “fachenda e raíz da nosa identidade”. Pero o corazón do escudo reside nesa chorima, nesa flor de toxo que é un “emblema de resistencia, fortaleza e feminismo”.
Lembran na súa explicación da elección deste elemento, que “o toxo é un arbusto galego que medra nos terreos máis difíciles, soporta o frío, a seca, e protéxese coas súas espinas. É unha planta resistente que simboliza a loita e a protección”. E logo a flor do toxo, a chorima, é a antítese por ser delicada, sensible, bela pero á vez forte. Reflicte as nosas deportistas que loitan por conseguir os seus soños, que protexen e protéxense, que teñen fortaleza e sensibilidade a un tempo”.
Por iso no Ourense OnTime FSF sosteñen que este novo escudo é unha homenaxe “a esa dualidade, a esa forza e sensiblidade que nos define como equipo e como comunidade. É un símbolo de resilencia, esperanza e orgullo galego”, explican.
Un traballo conxunto de Bea Seijas e Marta Figueiredo
Na elaboración desta nova imaxe para o Ourense OnTime FSF está, unha vez máis, a man de Bea Seijas. Esta deseñadora gráfica, que asina os seus traballos como Bea Seijas Diseño, desempeñou diferentes roles no club entre dos máis coñecidos están o de xogadora e adestradora, pero hai anos que se encarga da imaxe da entidade. Diferentes campañas levadas a cabo nos últimos anos no Ourense OnTime FSF levan a súa sinatura, e destacan pola súa orixinalidade, sentimento, compromiso e transmisión de valores.
Sumóuselle desta volta tamén outro alicerce da entidade ourensá, Marta Figueiredo que se encargou da gravación do vídeo promocional, pero que tamén aportou ideas para significado aos elementos que finalmente conformaron o escudo. A suma das mentes destas dúas futbolistas, alicerces do club que levan anos ligadas á entidade, que teñen, en ambos os dous casos, sensibilidades artísticas (Marta Figueiredo é Licenciada en Percusión e fai da música a súa outra pasión lonxe das pistas de futsal). E no caso de Bea Seijas o deseño gráfico leva tamén anos sendo parte da súa traxectoria profesional.
Xuntas idearon a base á que desde o estudio Bea Seijas Diseño se lle deu forma e se elaborou como unha identidade gráfica robusta na que se poida ver reflectida unha entidade coma historia, presente e futuro do Ourense OnTime FSF.
A voz en off da peza audiovisual vai por conta de Montse Estévez. Neste vídeo explícase:
“Nacemos dunha terra de pedra quente e man con callo, de fontes que curan, de ríos que abrazan. Un lugar onde a calor sae do chan e tamén do corazón. Terra de carácter bravo de néboas e lume. Coma o toxo abrímonos paso con forza.
Firmes, en pé. Por que no noso corazón late Galicia. Coma o toxo que resiste e florece sen pedir permiso. Bravas, forte e valentes, florecendo xuntas”.
