A xornada 17 da Primeira División de fútbol sala arranca con todo un partidazo. Ourense Envialia recibe no pavillón de Os Remedios ao UA Alicante ás 17.00 horas. As de Morenín veñen de gañar ao Leganés a domicilio nun duro encontro.
Gañar e non descolgarse de Burela e Futsi. Esa é a premisa coa que arranca a xornada para as ourensás. Non foi unha semana fácil para as galegas xa que tiveron moitas baixas por diferentes motivos: “É unha semana un pouco complicada porque tivemos exames, xente con gripe, Chiky na selección e tivemos que tirar do filial e non foi unha semana doada para nós”, destacou Morenín na previa.
Morenín, adestrador do Ourense Envialia: “UA Alacante é un gran equipo. Ten a uns dos mellores adestradores da categoría, Carlos Navarro e xunto con Poio é o conxunto que mellor se reforzou no verán”.
Nacho Rego @nachorego
Chiky, capitana e internacional
A número 3 non puido adestrarse durante a semana co Envialia pola súa convocatoria co combinado nacional. A peche disputou os dous encontros entre España e Portugal, os días 14 e 15 de xaneiro, e foi clave nalgunhas xogadas de gol. Para a tranquilidade de afección local, Chiky estará na pista o sábado contra as alicantinas.
Morenín falou das fortalezas do seu próximo rival e destacou ás súas xogadoras máis perigosas: “Nas primeiras xornadas fixeron poucos puntos pero é un equipo que ten moito control de balón e é moi físico. As súas xogadoras fundamentais son Carmen e Consuelo. Tamén teñen un par de xemelgas que son moi boas”.
Morenín, adestrador do Ourense Envialia: “Non miramos o calendario, nós temos que gañar e competir ben en casa co apoio da nosa afección. As últimas tempadas conseguimos gañar ao UA Alicante e esperamos que o sábado sigamos coa mesma tónica”.
OURENSE ENVIALIA
As galegas seguen coa baixa por lesión de Laura Doce pero recuperan a Carol. A pesar dos procesos gripais que sufreu a plantilla durante a semana, o resto do equipo está en condicións para disputar o encontro.
