Din que “A forza do lobo está na manda”. O Ourense Envialia xoga con esa idea para explicar a súa resiliencia como grupo o pasado curso no que as lesións castigaron ao equipo. Agora a camiseta do conxunto ourensá, á que chaman xa “A nosa nova pel”, serve para rememorar o feito partido a partido e para reconducir, de xeito positivo, os ‘golpes’ recibidos a pasada tempada na que as xogadoras ían caendo lesionadas unha tras outra.
O Ourense Envialia xa nos teñen acostumadas a que as súas camisetas cada tempada son moito máis ca unha prenda deportiva para defender unhas cores. Os seus lemas de campaña e os porqués das súas elásticas esconden sempre algo máis. Xa vos temos falado da súa camiseta feminista, de cor lila e na que o nome das xogadoras que aparece impreso nas costas é o apelido da nai.
Desta volta a equipación das ourensás bota a mirada atrás para aprender do vivido e facerse máis fortes como grupo. O lema é xustamente #AForzaDoLobo e as camisetas levan impresa a frase “A forza do lobo está na manda” envolvendo a silueta de varios destes animais nas cores do club, lila, azul e laranxa. Os lobos semellan ouvear cara ao ceo.
“É unha homenaxe á nosa forza”, din desde o Ourense Envialia
Segundo explican desde o club o pasado curso tivo “malos momentos, lesións, confinamentos, situacións moi difíciles”. Por iso no Ourense Envialia quixeron que a súa “primeira equipación fose unha homenaxe á nosa forza da tempada pasada, a todas e cada unha das persoas que “sufriron” e traballaron con nós para superarla… GRACIAS”.
O tempo transcurrido nos meses que durou a campaña 2020-21 foi unha espazo de tempo que puxo a proba a toda sociedade por ter coincidido cun momento álxido da pandemia de COVID-19.
Para o deporte, como para outras actividades, foi unha tempada do máis inusual, accidentada e chea de incertezas. No caso do Ourense Envialia, o curso deportivo puxo aínda máis a proba se cabe a fortaleza do grupo como colectivo. No club falan exactamente neses termos “unha tempada que nos puxo a proba”, pero da que tamén din que saíron “vitoriosas”.
“Se cae unha, está a outra”. A que fala é Laura Uña que se expresa así no vídeo no que explican os motivos que deron lugar a sacar a camiseta #AForzaDoLobo.
Como apuntan no vídeo “A manda é un conxunto de individuas unidas en favor da protección de cada unha delas”.
Iria Saeta: “A forza do grupo está por encima de todo”
O certo é que aquí neste bloque que adestra desde hai anos Gonzalo Iglesias, Morenín, non hai alfa que se impoña ao resto. Nin sequera Marta Figueiredo a gran capitá. Unha muller con calidade futbolística contrasdada, chea de carisma, entusiasmo, enerxía, vitalidade e unha alegría que contaxia grazas ao seu sorriso sempre presente. Non. Tampouco ela é máis ca manda.
“A forza do grupo sempre estivo por encima de todo”, explica Iria Saeta. “As que se lesionaban sempre estaban aí, apoiando”, di a futbolista galega. A cancerbeira Vane Barberá insiste na idea base que queren transmitir con esta camiseta: “sabemos o importante que é a fortaleza do grupo”.
Teño para min que unha manda é moi diferente dun rebaño. Na manda hai individuas que toman decisión por si mesmas e optan por ser fortes dentro do grupo sen perder a súa personalidade. Nesta manda do Ourense Envialia, por exemplo, respírase sororidade, resiliencia e amizade. Son fortes por separado, pero xuntas, moito máis e deciden xuntarse.
O LCA do demo!
Non foron poucas as lesións coas que o club ourensá tivo que bregar o pasado curso. O batacazo máis forte foi, seguramente, a lesión da capitá, Marta Figueiredo. A muller do eterno sorriso tamén foi baixa. Nada menos que unha rotura do ligamento cruzado anterior (LCA) e o menisco externo. Aló foi o xeonllo e a tempada un mal día do mes de marzo. “Ninguén quería seguir xogando ese partido
Outra que tivo que pasar por quirófano foi Sara Moreno, tamén por mor do LCA. E esa misma lesión petou á porta de Andrea Feijóo. A escena repetíase coma nun día da marmota fatídico e as xogadoras ían caendo lesionadas de longa duración mermando as forzas sobre a pista dun grupo que quedou moi curto de rotacións. Foi aí cando o poder da manda, do grupo, foi fundamental para resistir e sacar adiante a tempada.
Unha camiseta con mensaxe e doazón
Agora que xa sabedes a mensaxe que se agocha tras #AForzaDoLobo queremos contarvos que detrás da venta desta camiseta hai máis que paixón por unhas cores, as do Ourense Envialia, neste caso. O club anuncia que mercar esta elástica deseñada por Bea Seijas Diseño Gráfico supón unha “colaboración activa” xa que de cada venta se realizará unha doazón á protectora Arume do Carballiño”. Segundo fai saber a entidade 5 euros dos pagados pola camiseta se adicarán a este fin.
“Cremos que é unha boa causa e axuda a xente que fai unha labor tan boa de xeito altruísta. Fan unha labor impagable con animais abandoados ou con problemas intentando axudarlles e reubicalos en fogares dándolles así unha vida mellor”, explica desde o Ourense Envialia.
Explican tamén que case na súa totalidade a prenda está fabricada “con tecido sostible”. Emprégase tecido Dryclim que é un tipo de material de poliester reciclado a partir de botellas de plástico. Non é a primeira vez que o Ourense Envialia opta por este material para así aportar o seu grao de area ao coidado do medio ambiente.
Se logo de coñecer a súa historia, ti tamén queres ser parte da manda e ter a túa camiseta, podes entrar na tenda online do Ourense Envialia e adquirir a túa. Como explicamos ao mercala colaboras coa Protectora Arume do Carballiño (Ourense).
