O pasado venres, 18 de setembro, coñecíase o calendario de Primeira División Feminina de Fútbol Sala. O duelo galego entre o Ourense Envialia FSF e o Pescados Rubén Burela FS abrirá a tempada 20/21, que estará marcada pola situación sanitaria.
Nesa primeira xornada, que se disputará o fin de semana do 17 de outubro, o recente ascendido Viaxes Amarelle FSF e o Cidade de As Burgas FS viaxarán a Madrid para xogar contra Alcorcón FSF, un dos participantes da ‘final-four’ disputada en xuño, e Leganés FS respectivamente, mentres que o Poio Pescamar visitará Murcia para enfrontrarse ao Roldan Futsal Femenino.
Así serán os cruces galegos durante a tempada 20/21
- Xornada 1/18 (17 de outubro/6 de marzo) Ourense Envialia – Pescados Rubén Burela
Jenny Lores estrease co Envialia contra o seu antigo equipo, no que estivo unha única campaña.
- Xornada 2/19 (24 outubro/13 de marzo): Viaxes Amarelle – Ourense Envialia
Primeiro duelo galego do Viaxes Amarelle despois de volver á máxima categoría será como local.
- Xornada 3/20 (31 de outubro/20 de marzo): Pescados Rubén Burela – Viaxes Amarelle
As campioas de ligas reciben na casa ao recente ascendido.
- Xornada 5/22 (14 de novembro/31 de marzo): Ourense Envialia – Poio Pescamar
Iria Saeta enfrontarase ao seu ex-equipo, despois de que o conxunto pontevedrés anunciase que non contaba con ela o pasado maio.
- Xornada 6/23 (21 de novembro/3 de abril): Poio Pescamar Pescados – Pescados Rubén Burela
O Poio Pescamar terá que xogar dous partidos consecutivos contra dous dos aspirantes ao título a pasada campaña.
- Xornada 7/24 (28 de novembro/10 de abril): Viaxes Amarelle – Poio Pescamar
A última fichaxe das coruñesas, Anna Escribano, xogará contra o conxunto no que militou a pasada tempada.
- Xornada 9/26 (8 de decembro/24 de abril) Ourense Envialia – Cidade de As Burgas
O derbi ourensá xogarase na ponte de decembro, cos equipos xa totalmente metidos na dinámica competitiva.
- Xornada 10/27 (12 de decembro/8 de maio): Cidade de As Burgas – Pescados Rubén Burela
O conxunto de Codeso enfrontarase contra o campión na casa xusto antes do parón de Nadal.
- Xornada 11/28 (16 de xaneiro/15 de maio): Viaxes Amarelle – Cidade de As Burgas
O equipo ourensá enlazará, con este, tres encontros consecutivos sen saír de Galicia para xogar.
- Xornada 14/31 (6 de febreiro/3 de xuño): Cidade de As Burgas – Poio Pescamar
Na penúltima xornada, as pontevedresas visitarán Ourense e Os Remedios.
O Pescados Rubén Burela buscará defender o título conseguido en Murcia
O 28 de xuño o Pescados Rubén Burela conseguía o título ligueiro tras gañar ao Alcorcón FSF na final dun play-off ata o de agora inédito e motivado polo parón provocado polo COVID-19. A non presentación do CD Futsi, líder invicto con 23 vitorias en vitorias, alegando que non podía preparar os partidos nas mesmas condicións ao estar Madrid en diferentes fases da desescalada, marcou esta fase final.
As de Julio Delgado pasaron directamente ao encontro polo título, que solventaron cun 3-2 ao equipo madrileño. O equipo lucense afronta esta nova tempada coas baixas de Luci Gómez, Ana Romero e Jenny Lores, coa que se enfrontará no primeiro partido de liga contra o Ourense Envialia.
O equipo ourensá tamén estivo presente no play-off disputado en xuño, pero correu unha sorte diferente. Caeu nas semifinais contra o Alcorcón FSF, nun encontro no que remontaron un 3-1 pero no que finalmente caeron na tanda de penaltis. A incorporación da xogadora do Pescados Rubén Burela é un dos cambios que presenta con respecto ao plantel do ano pasado. As ourensás contan con reforzos de peso como Iria Saeta, Jenny Lores e Andrea Feijóo.
O Poio Pescamar foi o primeiro clasificado “do resto da liga” ao quedar no quinto posto, a 12 puntos do Alcorcón FSF. O plantel estará conformado por dez caras coñecidas no equipo pontevedrés e catro fichaxes, entre os que destacan as últimas en chegar ao equipo, internacionais arxentinas, Julia Paz e Chiesa.
A tempada do Cidade de As Burgas non foi para o recordo. 11 puntos en 23 partidos e antepenúltimas na clasificación era o balance das de Codeso no momento do parón. O equipo ourensá renovou á maior parte dos seus piares e ademais incorporou África Pazos, Fara Antonlín e Sol Pedrera.
O Viaxes Amarelle volve á máxima categoría do fútbol sala feminino tras gañar o play-off de ascenso ao Valdetires FSF. As coruñesas foron as que máis cambiaron o plantel con respecto ao ano pasado. Inés Suárez, Reneé Huizinga e Irune Santaesteban abandoaron a disciplina de Basanta, pero reforzándose ben coas fichaxes de Anna Escribano, Laura Doce, Cristiana Loures, Candela Soria, Leti Rojo e a volta da canteirana Sofía Rodríguez.