Nestes días o Ourense Envialia pechou as renovacións de dúas futbolistas para o seu segundo equipo. Trátase, de Sandra, que levaba un ano xa no equipo, e de Nuria quen, logo dunha traxectoria máis ampla nas categorías inferiores deste club galego, este ano fará a pretempada co primeiro equipo que milita na máxima categoría do fútbol sala estatal.
Da primeira, contan desde o club ourensá que ten o futuro nos seus pés. A futbolista ten 18 anos e unha proxección enorme grazas á súa “calidade, ilusión, compromiso e traballo”, din desde o club.
No Ourense Envialia asumen a “responsabilidade o compromiso de tratar de ensinarlle tanto fútbol sala os como valores que entendemos que debe ter unha deportista”.
Nuria estará na pretempada co equipo de Primeira División
No caso de Nuria, no Ourense Envialia falan dun “diamante” e amósanse “moi felices de anunciar a renovación desta muller de Celanova que leva xa moitos anos ao noso lado e cada unha das tempadas confirma as súas prometedoras cualidades neste deporte”.
De feito, segundo anuncian desde o club orensá, a futbolista fará a pretempada co primeiro equipo e “sen dúbida será unha das habituais na dinámica do conxunto de Primeira División”.
No equipo laranxa aseguran non ter “ningunha dúbida con ela tanto sobre as súas cualidades deportivas, como humanas. Nuria é unha das nosas”, aseguran desde a entidade.
