Nos Remedios, ás 17:00 horas desta tarde de sábado (29 de xaneiro) o Ourense Envialia recibe ao Joventut d’Elx, colista. A visita do faroliño vermello é unha ocasión propicia para que o conxunto que adestra Gonzalo Iglesias Morenín, prosiga a súa escalada de posts na táboa.
Os efectos da vacinación impediron ao adestrador das ourensás poder contar con algunhas das súas xogadoras no traballo semanal. O reforzo desde o banco para contar con refresco nas rotacións está asegurado por parte das futbolistas do conxunto filial, que esta semana non xoga debido a que o seu partido co EDF promesas está adiado.
Este cruce suporá tamén o retorno ante a súa afección da futbolista cordobesa Sara Moreno. A deportista xa contou con minutos a pasada semana pero aínda non xogou como local en Ourense logo da súa longa lesión de xeonllo. Será, sen dúbida, algo para festexar para este bloque de futbolistas que este ano teñen como lema que a forza da loba está na manda. E así, como grupo unido, defenden facerse cun sitio propio na parte alta da clasificación da Primeira División da RFEF.
Agora mesmo o Ourense Envialia é sétimo con 21 puntos. A só dous dos postos de play-off. Se mañá domingo 30 de xaneiro, o Poio Pescamar vence ao Móstoles FSF poden facerlle, de camiño, un favor ás galegas. Terían que pinchar tamén a Arriba AD Alcorcón FSF (sexto con 21 puntos) que visita ao Melilla Sport Capital Torreblanca FS, e tamén o Universidad de Alicante (quintas con 22 puntos) que recibe ao Atlético Torcal.
