A Morenín tócalle despedirse do banco do Ourense Envialia nun último partido fóra da casa. Unha mágoa por que seguro que o adestrador, en terras ourensás, recibiría o cariño dun público que sabe que o técnico é un home da casa. Gonzalo Iglesias, Morenín, e o club anunciaban que o adestrador pecha este curso a súa segunda etapa á fronte do corpo técnico do Ourense Envialia, e saben club e adestrador que esto non é un adeus. Como moito un ata logo, porque estamos ante un preparador que, logo de recargar forzas, seguro que estará á disposición da entidade cando os seus servizos volvan ser reclamados.
O Joventut d’Elx FS é o último rival desta tempada para o Ourense Envialia. O encontro terá lugar en Elche ás 18:30 horas de mañá sábado. Será unha última parada para Morenín, que afronta o partido co equipo que prepara na 9ª praza da táboa clasificatoria. Enfronte estará o colista.
Péchase unha etapa de catro tempadas moi complicadas nas dúas últimas con pouquísima sorte nas lesións e moitísimo traballo en equipo dun bloque forte que tivo no que elas mesmas chaman #AForzaDaManda a súa maior forza.
Esa Forza do lobo que está na manda, no grupo, precisa dunha persoa que saiba ser propiciadora de que precisamente o grupo sexa o máis importante. As persoas que o conforman, e os seus valores, son tamén imprescincibles, sábeno ben no Ourense Envialia un club que leva anos incidindo na importancia da educación en valores. Pero sábese que nos deportes de equipo, a xestión do grupo e tan importante como os coñecementos técnicos e tácticos ou a preparación física. Morenín, aportou e moito, na táctica, na preparación e tamén na xestión do grupo, na forza da manda.
Remátase así un período de catro anos que foi xa a súa segunda etapa á fronte do banco do Ourense Envialia. E Gonzalo Iglesias, Morenín, despedíase con estas palabras:
“Chegou o momento de poñer punto e final a esta segunda etapa no club, que sen dúbida é a miña casa e do que me considero parte, pero todos os proxectos, sobre todo no deporte profesionalizado como o noso, teñen as súas etapas e ésta, ten concluído logo de catro anos nos que temos compartido experiencias e viviencias que para sempre levarei comigo.
Está claro que houbo momentos marabillosos como os play-offs polo título, as fases finais de Copa da Raíña, as finais da Copa de Galicia pero tamén momentos duros e difíciles que temos vivido e que sen dúbida nos teñen feito máis fortes a todos/as e que nos forneceron como grupo, pero, aínda que todo iso é marabilloso, o que máis me levo son os momentos que temos compartido e vivido.
Tamén toca dar as grazas a todos/as as persoas que rodean ao club e que axudan no día a día para que todo funcione nun deporte que cada día é máis esixente por iso desde aquí quero dar as grazas ás xogadoras, empregados do club, patrocinador e directiva polo seu traballo e dedicación.
Ademais de modo moi especial, quero agradecer a todo o meu corpo técnico todo o traballo, dedicación e profesionalidade que puxeron sempre en cada unha das tarefas e traballos que temos feito, de verdade: GRAZAS.
Por último, quero dicir ata logo, estou certo de que VOLVEREI (xa sabedes que son moi cinéfilo)
MORENÍN
No club anunciaban esta baixa de cara á tempada 2022-23 para o equipo de Primeira División do FutSalFem RFEF confirmándolle Morenín que o cariño é mutuo e que a casa ourensán “sempre será a túa casa”.
O pasado sábado o técnico cumplía nada menos que 200 partidos á fronte dun banco no que non se sentará a vindeira tempada.
HASTA PRONTO 😉 https://t.co/GDpmPZWbtH pic.twitter.com/YEdFFQQLeP
— Morenín (@gmorenin23) June 8, 2022
Último partido de Morenín, co colista
Aínda que o partido sexa fóra da casa, o rival, o Joventut d’Elx FS, é o pechacancelas e está descendido. Así que o conxunto ourensá ten unha ocasión fantástica para despedir a Morenín cunha vitoria que deixe bo sabor de boca ao técnico e poña fin a unha serie de resultados que non acompañan con triunfo desde que a principios de abril o Ourense Envialia vencía a o Universidad de Alicante (4-0). Foi a xornada 22ª e rematamos coa 30ª.
Demasiada mala sorte para que continúe tamén esta última xornada. Este ata logo merece tres puntos. A por eles!
