O equipo herculino do Viaxes Amarelle FSF afrontaba esta fin de semana un novo derbi galego na Primeira Federación Futsal Feminina, recibindo a un Ourense Envialia FSF, que a pesar de ocupar unha posición menos na xeral que as herculinas, opta á zona nobre por bloque de xogadoras cheo de experiencia na categoría. En xogo estaba quen quedaba por diante la clasificación e o premio foi para as da Cidade das Burgas.
As herculinas expuñan un partido moi serio, e a pesar de que a primeira parte tivo un maior dominio a escuadra ourensá. A segunda metade foi para as locais. O Viaxes Amarelle contou ata con tres balóns que acabaron estrelándose nos paus da meta visitante. Pero a recompensa do gol non chegou.
Dada a igualdade vivida na Sagrada Familia o máis xusto tería sido un reparto de puntos, pero neste deporte mandan os goles e as ourensás acadaban o éxito neste apartado cun solitario tanto que subía ao electrónico do pavillón coruñés no tramo final da primeira parte.
O partido empezaba con dous equipos que se coñecen ben, e que aínda hai pouco máis de dous meses que disputaron o seu último duelo na Copa Galicia Feminina de fútbol sala. Nesa competición as herculinas conseguiron o pase a semifinais tras unha dura quenda de penaltis.
Xa na liga o encontro entre Viaxes Amarelle e Ourense Envialia empezaba con accións ofensivas para ambas as dúas escuadras. Quen parecía que estaba a ter algo máis de chegada nesta primeira parte, eran as visitantes que non atinaban coa meta defendida por Leti Rojo.
As herculinas tampouco desaproveitaban as súas opcións e xeraban ocasións perigosas. Ocasións había polo tanto polas dúas bandas. Pero o gol non chegaba para ningunha das dúas escuadras. Os minutos ían correndo no luminoso, ata que a falta de algo menos de dous minutos para o descanso chegou o gol que desequilibraría o marcador e con el a polémica.
Un gol marcado pola polémica que deu o partido ao Ourense Envialia
Cris Lourés recupera un balón e busca o pase á compañeira elevando o balón. A traxectoria do esférico córtaa María Arias tocando o balón coa man, segundo defenden as herculinas e parece apreciarse no vídeo do partido. Pero o equipo arbitral non ve nada na xogada. O balón cáelle ao pé e toca cara a Jenny Lores, que vira na liña de área e anota o 0-1 no marcador. A polémica, con esa posible man que precede ao gol visitante, está servida.
As visitantes atópanse con vantaxe no marcador, e toca seguir remando para as herculinas, e buscan a igualada no último minuto e medio da primeira metade, aínda que sen fortuna.
Logo do paso por vestiarios, o Viaxes Amarelle FSF toma a iniciativa no xogo e envórcase en ataque para tentar igualar a contenda. Pola contra, o Ourense Envialia FSF céntrase máis en tarefas defensivas para tratar de manter a vantaxe obtida na primeira metade.
As ocasións empezan a sucederse para o conxunto herculino, pero non termina por finalizar con contundencia entre os tres paus, aínda que envía varios avisos con balóns que van directos aos paus da portería defendida por Uxía.
O Viaxes Amarelle FSF estaba a levar a batuta e o peso do partido, e a pesar de que conseguía chegar arriba, non terminaba de finalizar as súas ocasións. Fallaba o último disparo. Nas filas do Ourense Envialia as futbolistas que adestra Mondo buscaban afastar o balón da súa portería con balóns en longo ao pivot, para tentar ampliar distancias, pero sen perigo para a defensa local.
Os minutos pasaban, e co marcador igual no 0-1. Con este escenario, o técnico local, Jorge Basanta, opta por sacar o xogo de cinco no tramo final do partido. Froito desa decisión chegan un par de ocasións aínda máis claras para conseguir a igualada no marcador.
Case acontece o contrario cando nunha recuperación da gardameta Uxía, manda un balón a portería baleira. O traveseiro termina por salvar o que sería o segundo gol visitante. As locais tentárono ata o último segundo, pero o gol non terminaría por chegar, e os tres puntos terminarían sendo para un Ourense Envialia FSF, que con este triunfo adianta na clasificación ás herculinas.
No caso das coruñesas, a disputa da Primeira RFEF FutsalFem volve coa novena xornada da competición. O Viaxes Amarelle FSF xogará o sábado 19 de novembro de 2022, a partir das 17:00 horas no Pavillón Municipal Gabriel Pérez Sánchez (Torre-Pacheco) contra do STV Roldán FSF.
Para as ourensás, a liga regresa tamén o sábado 19/11/22 e tamén ás 17:00 horas pero en Ourense e recibindo ao LBTL Futsal Alcantarilla, cuarto clasificado.
Logo da disputa desta oitava xornada o Ourense Envialia marcha 8º na clasificación da Primeira RFEF FutsalFem con 9 puntos e o Viaxes Amarelle 11º con oito.
FICHA TÉCNICA
0) VIAXES AMARELLE FSF: Leti Rojo, Laura Rivas, Lau Doce, Tety, Cláudia Lobo (cinco inicial), Èlia Gullí, Cris Lourés, Carol Agulla, María Gómez, Marta Hermo, Carlita.
1) OURENSE ENVIALIA: Uxía, Chiky, Jenny Lores, Marta, Candela Soria (cinco inicial), Clara Fernández, Vero, María Arias, Sara Moreno, Zaide.
GOLES: 0-1 Jenny Lores (min. 18).
EQUIPO ARBITRAL: José Manuel Carreira Romero e Javier Menéndez Nistal, do Comité Técnico de Árbitros da Coruña e A Mariña. Arbitro Asistente: Alejandra Bujía Piñeiro-Varela do Comité Técnico de Árbitros de Ferrol. Mesa: Berta García Vázquez do Comité Técnico de Árbitros da Coruña. Amonestaron ao adestrador das coruñesas, Jorge Basanta, con cartón amarelo nas filas do Viaxes Amarelle FSF. No bando do Ourense Envialia CF viu cartón amarelo a autora do gol, Jenny Lores.
INCIDENCIAS: Partido correspondente á oitava xornada da Primera División da RFEF de Fútbol Sala Femenino disputado no Pavillón Municipal da Sagrada Familia na cidade da Coruña. Derbi galego.
