As galegas non perdoaron na súa visita a terras alicantinas. O Ourense Envialia levou a vitoria por 4 a 0 ante un Xaloc Alacant que non estivo cómodo case en ningunha fase do partido. As ourensás fixeron valer o seu maior dominio do balón, cunha gran posesión ante un conxunto local ao que lle custaba chegar con perigo á área rival.
A pesar da vitoria avultada, as galegas sufriron nos primeiros intres, xa que se viron superadas pola intensidade local. “Nos primeiros intres do partido, nós saímos pouco intensas e elas saíron moi enchufadas e puxéronnos en problemas”, falaba Morenín sobre o comezo do partido.
Pasados cinco minutos, o Envilia asentouse na pista e aos sete minutos de xogo, Marta poñía por diante as galegas tras remachar dentro da área un balón solto tras un potente disparo desde unha das bandas. As galegas eran donas do choque e practicamente non estaban a pasar apuros, tras o mal comezo.
Morenín, adestrador do Ourense Envilia: “A partir do minuto 5 xa fomos nós mesmas, con moito dominio de balón, xerando moitas ocasións tanto con ataque posicional como a balón parado”.
Aos catorce minutos ampliaban a súa renda cun golazo da cordobesa Sara Moreno de chute cruzado ao segundo pau. Coa vantaxe visitante chegaríase ao intermedio. Na continuación e co paso dos minutos as alacantinas tentarían aínda que sen acerto, subir as liñas en busca dun gol que as metese na pugna polos puntos.
Morenín, adestrador do Ourense Envilia: “O golazo de Sara Moreno, o 0-2, deunos moita tranquilidade. Foi un verdadeiro golazo desde 12 metros e bastante escorada”.
O segundo golazo da tarde foi obra de Leti. Nun intento de despexar o balón da súa portería, a gardamallas do Ourense sorprendía á cérbera local anotando o 0 a 3, que obrigaba ao Xaloc a optar polo xogo de cinco moi ben defendido polas de Morenín. Cun Xaloc volcado, chegábase ao tramo final, no que a sentenza a anotaba Judith a porta baleira para deixar o contundente 0 a 4.
O punto negativo do partido foi o golpe de Irene no xeonllo, ainda que afortunadamente “parece máis un golpe que unha lesión grave” según confirmou o seu adestrador, Morenín. As galegas suman 44 puntos en Liga e seguen no terceiro posto coa mirada posta no Futsi e no Burela.
FICHA TÉCNICA
XALOC ALACANT: Xema; Miriam, Tere, Angy e Claudia (quinteto inicial). Tamén xogaron, More, Paula Morote, Ortiz, Elena, Lydia e Irene Sáez.
OURENSE ENVIALIA: Vane Barberá; Chiqui, Candela, Marta e Sara Moreno (quinteto inicial). Tamén xogaron, Judith, Iraia, Laura Uña, Sara Santos, Leti (segunda porteira) e Cárol.
GOLES:
0-1, min. 7 Marta
0-2, min. 14 Sara Moreno
0-3, min. 32 Leti
0-4, min. 40 Judith
COLEXIADOS: Roupeiro Lara e Cristian Reig do colexio alacantino. Sen amoestacións.
INCIDENCIAS: Pavillón Municipal Pitiu Rochel de Alacante. Preto de 100 espectadores.
