A primeira vitoria para o Ourense Envialia chegou fóra de casa. As xogadoras que adestra o técnico galego Gonzalo Iglesias Morenín gañaron e fixeron por 0-4 a domicilio ante o Atlético Torcal no Pavillón de Guadaljaire. Asinaron os goles galegos as futbolistas: Iria Saeta, Robinha (2) e Chiky. A brasileira debutaba e facía dous tantos.
Volvía a competición á Primeira División do FutSalFem estatal logo do parón por compromisos da Selección Española e o fixo con triunfo para o conxunto da Cidade das Burgas que nesta xornada vestíu de branco.
As andaluzas que adestra Víctor Quintero tentaron sen éxito desmantelar o xogo de equipo do conxunto galego. Atinadas en ataque con Robinha como bigoleadora e anotado un gol de vaselina, as ourensás conseguiron mandar no tempo do partido. O traballo das garda mallas Vane Barberá e Elisa Robes na portaría (primeira parte para Vane e segunda para Elisa) foi tamén fundamental para manter o casilleiro galego a cero no marcador electrónico do Guadaljaire.
Abría o marcador Iria Saeta aos dous minutos de xogo. Antes dos dez minutos de xogo volvía anotar o Ourense Envialia por medio de Robinha. A trinta segundos do final do primeiro período Chiky aproveitaba un tres para dous e anotaba un descorazonador 0-3 para as locais. Á volta de vestiarios as andaluzas saíron con forza buscando roubar e sorprender cunha presión alta en cancha rival. Pero o Ourense Envialia aguantou o empuxe das locais e, co paso dos minutos controlou o partido outra vez.
Nin o xogo de cinco que despregou o Atlético Torcal nos últimos compases do encontro serviu para dobregar a un Ourense Envialia que tiña claro o seu plantexamento de partido ante as andaluzas.
A porteira do Ourense Envialia, Vane, asegura: “Tiñamos claro o noso plan”
A cancerbeira do Envialia, Vane Barberá, declaraba a Live Vuvuzela ao final do encontro que tiña sido un: “partido bonito de ver. Sabiamos que nos enfrentabamos a un equipo moi vertical e tiñamos claro o noso plan de partido e saínonnos bastante ben as cousas”.
Para a porteira do conxunto ourensá este era un encontro que o equipo viviu como “un partido moi importante. Non pensabamos que sexamos un equipo que estea chamada a loitar pola permanencia. Estamos sufrindo debido a que nos castigan as lesións, pero temos que estar máis arriba. Este era un partido que tiñamos que gañar ante un equipo que acaba de ascender e que está moi ben traballado. Coido que fixemos os deberes. Esta vitoria para nós era moi importante”, insistía a porteira.
Vane Barberá salientou que a interrupción da competición ligueira quince días pola Selección Española, beneficiou ao seu equipo: “O parón de 2 semanas tamén nos veu ben para recuperar xogadoras. É importante poder ir sumando. Sabiamos como xogaban e estivemos moi centradas no plan de partido”.
FICHA TÉCNICA:
ATLÉTICO TORCAL: Valeria; Eva, María Soto, Ale e Ceci – quinteto inicial -. Tamén xogaron: Mónica, Anita, Nuria, Ana Mayoral, Raquel, Nieves, Carmen e Claudia, Marina (p.s.)
OURENSE ENVIALIA FS: Vane; Iría Saeta, Chiky, Laura Uña e Judith – quinteto inicial -. Tamén xogaron: Jenny Lores, Nerea Lorenzo, Robinha, María Arias e Elisa Robes (p.s.)
GOLES: 0-1, min. 2 Iria Saeta. 0-2, min. 7 Robinha. 0-3, min. 20 Chiky. 0-4, min. 32 Robinha.
ÁRBITROS: Colexiados Quintero Carrión e Ugarte Ruiz. Amosaron cartón amarelo a Laura Uña, polo Ourense Envialia, e a Eva, pola parte do Atlético Torcal.
INCIDENCIAS: Partido correspondente á xornada quinta da Primeira División de Fútbol Sala Feminino da RFEF disputado no Pavillón Polideportivo de Guadaljaire. Encontro transmitido vía YouTube por Live Vuvuzela.
