Ourense centra as atencións do atletismo, con Toimil e Peleteiro como protagonistas

master de 800 m. W60

Expourense centrará todas as miradas do atletismo estatal co Campionato de España Absoluto de Pista Cuberta que se celebra do 25 ao 27 deste mes na instalacións ourensá. Alí estarán máis de 20 galegas, entre as que destacan as olímpicas Belén Toimil e Ana Peleteiro.

A primeira delas non chega na súa mellor forma, xa que aínda está a recuperarse dunha lesión. “Non chego nas condicións que me gustaría debido a unha escordadura de segundo grao no nocello esquerdo que me fixen adestrando o 31 de xaneiro. Non deixamos de traballar para recuperar o antes posible, pero os prazos son os que son”, explicaba nunha publicación de Instagram a atleta mugardesa.

Con todo, Belén Toimil de seguro daráo todo no Campionato de Pista Cuberta. “Irei a Ourense a intentar defender o ouro conseguido o ano pasado. Cada día de traballo e rehabilitación conta así que esperemos que me permita competir o sábado. Eu intentareino ata o final. Vémonos alí!”, escribiu.

 

Ver esta publicación en Instagram

 

Una publicación compartida de Belén Toimil (@belentoimil)

Quen tamén estará en Expourense é medallista olímpica Ana Peleteiro. A de Ribeira ten no seu palmarés o bronce de triplo salto dos Xogos Olímpicos de Toquio 2020, e acudirá a Ourense a defender o seu ouro na mesma proba.

Ademais, recentemente foi nomeada “atleta español do ano”, por riba de atletas como Katir ou Asier Martínez, recibindo un troefo que cada ano rinde homenaxe ao deportista máis destacado (home ou muller) entre as distintas modalidades das probas atléticas.

Tamén estará en Expourense a paralímpica Adi Iglesias, quen volveu de Toquio con dúas medallas, nos 100 e 400 metros, obtidas cunhas espectaculares marcas. O olímpico Adrián Ben é outra das bazas do atletismo galego para a competición.

As Nosas atletas

Esta será a segunda vez en tres anos que o recinto de Expourense acolle a gran cita estatal. As instalacións, que acolleron a edición do 2020, “o mellor Campionato de España en pista cuberta da historia“, segundo apunta a Federación Española, é das poucas que conta con tecnoloxía hidráulica no mundo, que permite a montaxe e desmontaxe da pista en cuestión de horas.

Alí citaranse unha vintena de galegas, que competirán con atletas do máis alto nivel estatal co obxectivo das medallas e de acadar a mínima para o Mundial de Belgrado.

Ademais de Toimil e Peleteiro en Ourense, destaca a presenza da local e vixente campioa de España ao aire libre de lonxitude, Leticia Gil, e doutras campioas de España como Solange Andreia Pereira (3.000m) e Saleta Fernández (altura).

Onde e cando ver as tres xornadas do mellor atletismo

A competición, organizada pola Deputación de Ourense, a Xunta de Galicia, o Concello de Ourense, a Federación Galega de Atletismo e a Real Federación Española de Atletismo, disputarase en tres xornadas.

O venres haberá probas de 15:00 a 20:35 horas, o sábado de 10:00 a 13:25 horas e de 18:00 a 21:26 horas e o domingo de 10:05 a 13:10 horas. O Campionato poderá seguirse en directo por Teledeporte, agás o tramo inicial do venres, que se emitirá vía streaming na canle de Youtube da RFEA. Os concurso poderán seguirse tamén na RFEAtv.