A cidade de Ourense está a perfilarse como un referente deportivo. Neste 2022, a localidade acollerá o Campionato de España absoluto de atletismo e o Concello está a levar a cabo obras de reforma e ampliación do estadio do Couto.
Nestas actuacións colabora a Secretaría Xeral para o Deporte, e por ese motivo o secretario xeral para o Deporte, José Ramón Lete Lasa, mantivo unha reunión de traballo co alcalde de Ourense, Gonzalo Pérez Jácome. Na xuntanza, ambos dirixentes estudaron o estado das diferentes actuacións que está a levar a cabo a Secretaría Xeral para o Deporte na cidade da Burga, así como a posibilidade de novas vías de colaboración de cara a 2022.
A reforma do estadio do Couto
No relativo á reforma do estadio do Couto, Lete Lasa apuntou que “o proxecto de reforma e ampliación é unha oportunidade non só de tratar aqueles aspectos relativos ao deterioro sufrido polas edificacións ao longo do tempo ou a renovaxión do seu equipamento de gradarío, senón a de poder ofrecer un conxunto máis funcional e máis flexible”.
Máis polo miúdo, as intervencións irán destinadas á reparación e rehabilitación estrutural; obras de renovación de carácter funcional; e as obras de ampliación demandadas, que se circunscriben ao edificio administrativo situado no fondo norte e que permitirán organizar de forma totalmente independente os usos puramente deportivos daqueles de carácter administrativo-social e representativo.
As devanditas obras terán un orzamento base de licitación de preto de 2 millóns de euros (1.984.857,11 euros) cun prazo de execución de 7 meses. No momento actual estanse a elaborar os pregos para adxudicar a obra canto antes e comezar cara o verán e que estea rematada en 2023.
Nese exercicio e unha vez rematadas as obras citadas, tamén terá lugar a renovación do terreo de xogo do Couto cun orzamento base de licitación duns 700.000 euros (676.982,65 euros) e un prazo de execución de 21 semanas.
Ourense, centro do atletismo estatal
Do mesmo xeito, segundo apunta a Xunta de Galicia, o secretario xeral e o rexedor ourensán sinalaron o “excepcional rendemento” da “mellor pista de atletismo cuberta de España” e na que a Xunta leva investidos 4,3 millóns de euros.
Ata o de agora, a pista sita en Expourense xa acolleu catro campionatos de España (un absoluto, dous máster e un sub20) e do vindeiro 25 ao 27 de febreiro acollerá un novo campionato nacional absoluto para o que Xunta e Concello xa están a traballar en todos os protocolos para que sexa a “auténtica festa do atletismo pero tamén da seguridade”.
Outros proxectos deportivos
Lete Lasa e Pérez Jácome tamén incidiron na boa marcha doutros proxectos deportivos que concirnen a Ourense como as obras de renovación do Complexo Deportivo de Monterrei, cun orzamento de 10 millóns de euros e que neste verán de 2022 porá ao desfrute do público as súas piscinas infantil e familiar; ou a obra no Pavillón dos Remedios , xa rematada, e que contou cun investimento de 2 millóns de euros, achegados de xeito íntegro polo Goberno autonómico.
Ao longo da xornada, Lete Lasa tamén mantivo encontros de traballo cos rexedores municipais doutros concellos da provincia de Ourense como San Cibrao das Viñas, Pobra de Trives, Cortegada, Manzaneda, A Peroxa e O Irixo, cos que analizou a posibilidade de establecer novas vías de colaboración para este ano 2022 para o que a Secretaría Xeral para o Deporte conta cun orzamento total de 32.489.463 euros, o que representa unha lixeira subida con respecto ao orzamento inicial de 2021 (32.474.216 euros).
