Paula Otero medra nas piscinas e afronta a súa primeira tempada como absoluta. A nadadora do CN Arteixo, habitual nos podios das competicións internacionais e estatais nas categorías base, debutou xa co Equipo Nacional no campionato europeo de Kazan, onde logrou dúas mellores marcas persoais.
Pero ademais, Otero puido competir no mesmo espazo que algúns das mellores nadadoras do mundo. “O ver a xente que vin este verán nadando nos Xogos Olímpicos, que os vín na tele, e velos pasar ao meu carón parecíame unha pasada. Ver as finais pola tarde e todo, notábase que xa non era un ambiente júnior”, confesa a As Nosas.
Ver esta publicación en Instagram
Experiencia previa
O debut nun campionato internacional como absoluta non a pillou desprevida. Otero xa estivera nunha concentración cando era júnior co Equipo Nacional Absoluto en Sierra Nevada no 2020, “pero era unha proba a ver que tal me desenvolvía cos absolutos”, recorda a nadadora.
Antes de acudir a Kazan, a galega viaxou a Tenerife para asistir a súa primeira concentración xa coa categoría de absoluta, coa que competirá agora excepto en augas abertas, onde aínda é júnior na proba dos 10km.
A nivel competitivo, non son poucos os éxitos que acumula Otero no seu palmarés, sendo algúns dos máis importantes para ela o bronce nos 1500 do Europeo e a clasificación para o 400 do Campionato de Europa de Roma que “malia non ter gañado por dúas centésimas, foi unha proba que me marcou tamén”.
Ter estes galóns previos axudaralle nas vindeiras competicións, xa que como ela mesma explica “ao final non deixa de ser o mesmo”, malia “pasar de ser a maior e telo máis controlado” a ter que desenvolverse xa nun ambiente sénior.
Paula Otero: “Se quero obter mellores marcas teño que facer os ritmos máis rápidos, esa é a diferenza”
Nos adestramentos, a nadadora do CN Arteixo segue coa mesma rutina de traballo, pero enfocando a tempada no “200 e o 400, que no Europeo foi do que mellor me saiu”. Con todo, é consciente de que para seguir mellorando, deberá “ser máis esixente nos ritmos de proba nos adestramentos. Se quero obter mellores marcas teño que facer os ritmos máis rápidos, esa é a diferenza”.
Ambición de futuro
A próxima cita no seu calendario é o campionato de España de inverno en Mallorca, que se disputará o vindeiro xoves, 25 de novembro. Pero nos seus plans de futuro, a nadadora explica que “xa que fun ao Europeo de inverno, está ir tamén ao de verán, que é en Roma, e intentar ir ao Mundial Absoluto de Xapón, pero quen sabe. O máis complicado é a posición, xa que só poden ir dúas e no fondo somos bastantes mozas”.
E a longo prazo, Otero non descarta acudir aos Xogos Olímpicos de París 2024: “Irei a por todas”.
