O LI Campionato de España de Invierno de piragüismo supuxo a reanudación da competición estatal na modalidade de esprint. A cita deportiva celebrouse a porta pechada nas instalacións do CEAR na illa da Cartuja en Sevilla, por mor da situación de pandemia por coronavirus. Galicia trouxo da capital andaluza un total de 16 metais dos cales seis foron en categorías femininas.
As categorías en liza neste Campionato de España de Inverno de esprint foron junior, sub23, senior y paracanoe. Na cita tomaron parte máis de 700 padexeiras e padexeiros e Galicia volveuse amosar coma unha potencia nesta disciplina colleitando 16 medallas das cales 5 foron de ouro (2 femininas), seis de prata (2 femininas) e cinco de bronce (2 femininas).
En canoa, na categoría senior feminina, as palistas pontevedresas Antía Jácome e Jenifer Casal remataban en segunda e terceira posición a súa regata de C1, unha proba que finalmente gañaría a deportista madrileña María Corbera. Na categoría Sub-23, Antía Otero que aínda é xuvenil, era a que gañaba en C1 e se traía para Galicia a medalla de ouro coma campioa de España.
Polo que respecta á modalidad de Kayak, Irene Lata Cagiao, deportista do Ría de Betanzos acadou o subcampionato en K1 e colgouse a prata ao pescozo. O trunfo foi para a valenciana Bárbara Pardo (Antella) e o terceiro lugar para Teresa de la Peña do Náutico Sevilla.
Para rematar, na categoría xuvenil, o ouro foi para a canoísta Valería Oliveira, do Piragüismo Poio que venceu en C1. Nesa mesma proba a deportista de Catoira, Rosalía García, do Club As Torres finalizaba a regata nun meritorio terceiro posto.
Resultados da representación galega masculina
Os deportistas galegos coparon o podio en categoría senior masculina C1 coa vitoria con autoridade do padexeiro do Breogán Diego Romero, que foi seguido na liña de meta polo seu compañeiro de equipo Noel Domínguez e polo deportista do tudense Manuel Garrido. Así que deuse un pleno de podio galego.
O mesmo pasou en categoría Sub 23 masculina, na que o triplo podio o conformaron o deportista de Ribadumia Manuel Fontán, David Barreiro do Breogán e Pablo Crespo do Escola de Piragüismo Ciudad de Pontevedra.
Na idade xuvenil, o padexeiro do Náutico Rodeira, Raúl Estévez, levou a medalla de prata, e Diego Domínguez, do CMDC Breogán, a de bronce.
Xa no Paracanoe, o padexeiro Ramón Fernández, que pertence á disciplina do Cidade de Lugo, proclamouse campión de España en KS1 e Enrique Navas, do Breogán, foi segundo en KL2.
No que atinxe á clasificación por equipos, segundo informa a Federación Galega de Piragüismo, o Kayak Tudense foi segundo con 2107 puntos, por detrás do Piragüismo Aranjuez que sumaba 2184 puntos e levaba o campionato. Ademais, entre os dez primeiros do campionato logrou meterse con 2319 puntos o club do Escolas de Piragüismo Ciudad de Pontevedra, mailo CMDC Breogán con 981 puntos.
Tests COVID-19 para poder competir
Dentro do protocolo de actuación neste campionato estatal, celebrado en terras andaluzas, todas as persoas participantes sometéronse a un test de antíxenos para previr o contaxio da COVID-19 durante a celebración do acontecemento deportivo.
O presidente da Federación Española de Piragüismo, Pedro Pablo Barrios, xunto á directora xeneral de Planificación, Instalaciones e Eventos Deportivos, Isabel Sánchez, foron os encargados de entregar os premios as/os diferentes medallistas no transcurso da sesión de peche do campionato que se celebraba tamén, nas instalacións do Centro Especializado de Alto Rendimiento (CEAR) La Cartuja de Sevilla.
CONSULTA OS RESULTADOS DO CAMPIONATO DE ESPAÑA DE INVERNO DE ESPRINT OLÍMPICO
