Paula Otero e Carla Carrón foron as dúas galegas elixidas para participar coa Selección Española no Open de Catalunya de natación, onde lograron moi bos resultados. Como parte do Equipo Nacional 2024, o conxunto español sumou dous podios na competición.
Tanto en 4x100m libres como en 4x200m libres, as nadadoras galegas do Club Natación Arteixo e do Club Natación Arzúa lograron unha terceira posición xunto coas súas compañeiras Martina Manresa e Ángela Martínez.
Estas foron as medallas que logrou a júnior Carrón, quen tamén competiu en 100m libres, logrando a 17ª posición, e en 200m libres, quedando 16ª.
Otero, pisándolle os talóns a Mireia Belmonte
Nas distintas categorías nas que competiu, a nadadora coruñesa Paula Otero foi das máis destacadas. A deportista do CN Arteixo logrou tres medallas e marcou bos rexistros para a tempada.
Otero, que está preparando os Xogos Olímpicos de París 2024, foi a única que logrou estar á altura de Mireia Belmonte e de Jimena Pérez, as españolas con mínimas para Toquio 2021. A galega logrou situarse por detrás delas en 800 e 1.500 metros libres.
Na competición de 200m bolboreta, Otero acadou unha prata, por detras de Cata Corró. Ademais, tamén fixo unha boa actuación en 100m libres, rematando na cuarta posición, e en 200m libres, onde quedou quinta.
Seguinte reto: Campionato de España júnior
Haberá que esperar ata marzo para ter outra competición de natación. En pouco máis de un mes e medio, celebrarase o Campionato de España Júnior, no que Paula Otero deberá confirmar a súa clasificación para os europeos.
A nadadora xa logrou as marcas mínimas para formar parte da competición internacional, pero deberá refrendalas no torneo español de marzo.
