Os podios Júnior e Sénior do XII Campionato de España de Longa Distancia tiveron acento galego. Dúas das nadadoras da nosa comunidade que competiron neste torneo, celebrado na localidade catalá de Sant Cugat, volveron con medalla: Paula Otero (ouro en 5.000 m libres de Júnior 1) e María de Valdés (prata en 5.000 m libres Sénior).
Na clasificación por clubs do feminino absoluto de natación, o equipo de Paula Otero, o CN Arteixo, logrou a cuarta posición e empatado a puntos quedou o CN Ponteareas. Na oitava posición quedou o CN Liceo e na décimo terceira o Club del Mar. O CN Galaico ocupou a 26ª posición do ránking por equipos.
Paula Otero, medalla e récord
A nadadora Júnior do CN Arteixo, Paula Otero, sumou a pasada fin de semana máis logros ao seu palmarés. A medallista partía xa nunha boa posición, tendo o segundo mellor rexistro entre as inscritas, pero sobre a distancia de 3.000 metros e non nos 5.000 metros nos que competiu.
Paula Otero foi quen de superar á súa máxima rival nesta competición, pero compañeira no Equipo Nacional: Ángela Martínez. Nos primeiros metros, a coruñesa foi aumentando a distancia con Martínez ata chegar a superala cunha gran diferenza, que lle permitiu colgarse a medalla de ouro.
A nadadora do Club Natación Arteixo rematou os 5.000 metros libres en 58:20, case nun minuto menos que a súa rival. Este tempo supón unha nova mellor marca nacional de 17 anos, un récord que Paula Otero xa posuía na de 16 anos, cun rexistro de 57:46.02.
Nesta mesma proba competiu Alicia Bouzas, do CN Galaico, quedando en novena posición cun tempo de 01:02:16.34.
Ao remate deste campionato, Paula Otero viaxou a Las Palmas para formar parte da concentración do Equipo Nacional Junior, Plan 2024. O obxectivo deste grupo da Real Federación Española de Natación (RFEN) é formar aos mellores nadadores españois de categoría júnior de cara aos próximos Xogos Olímpicos. Tamén está convocada a galega Carla Carrón, do Club Natación Arzúa.
María de Valdés bate a súa propia marca
María de Valdés, deportista do Club Natación Liceo, tamén chegaba á competición nunha boa posición. Partía como a segunda nadadora con mellor rexistro antes da disputa deste campionato. E tamén quedou segunda ao remate deste, por detrás de Jimena Pérez.
A gañadora desta proba Sénior superou o récord de Mireia Belmonte, cun tempo de 55:34.81. Pola súa parte, a nadadora do Liceo asinou un tempo lixeiramente maior, cun 56:55.97. Esta medalla de prata dálle fol a De Valdés, que segue loitando por un posto nos Xogos Olímpicos de Toquio 2021.
O Club Natación Ponteareas volve de Cataluña con éxito
Por parte do Club Natación Ponteareas, tres nadadoras competiron en categorías Infantil e Júnior 2. Na categoría de menor idade, a nadadora Iria Lemos quedou na novena posición, cun tempo de 38:30.86 e a súa compañeira Sofía Carballo foi quinta, cunha marca de 37:54.31.
Na categoría Júnior 2, Andrea Domínguez quedou sexta, cun tempo de 1:03:53.33. Ademais, neste club destacou tamén a actuación do nadador Pablo Cabana, que acadou a medalla de ouro nos 5.000 metros libres Júnior 1 masculino.
O Club del Mar acadou bos resultados
Tres nadadoras do Club del Mar de San Amaro competiron tamén neste Campionato de España de Longa Distancia. Qin Dosil participou en categoría Júnior 2 e logrou unha novena posición, cun tempo de 1:07:07.43. Nesa mesma posición quedou Nerea Alvite, cun tempo de 1:05.47.58 entre as Sénior.
Tamén en categoría Sénior competiu, representando ao club coruñés, Ana Veiga, que rematou en oitava posición, cunha marca de 1:05.47.58.
