O CVIII Campionato de España Absoluto OPEN de verán, e o XLII Campionato de España Júnior de verán rematan con grandes éxitos para a natación galega. A expedición irmandiña volve con oito medallas a casa.
A máis destacada é a de Paula Otero, campioa española absoluta, así como o ouro logrado por Ana Cernadas en categoría júnior, nas instalacións do C.N. Metropole de Las Palmas.
Primeira xornada
Na primeira xornada competitiva, a nadadora Paula Otero Fernández do C.N. Arteixo e bolseira do CGTD proclamouse Campioa de España Absoluta e tamén Júnior na proba de 1500 libre cun tempo de 16:19.46.
Con esta marca, Otero foi quen de establecer un novo récord do Campionato Júnior nos 1500 libre. Tamén o fixo nos 800 libre, cun tempo de 8:36.43.
Pola súa banda, o primeiro día de competición tamén tivo como nadadora a Aroa Silva Fidalgo do C.N. Santa Olaya e bolseira do CGTD, quen rematou terceira no 1500 libre na categoría Absoluto Mozo. Ademáis, Alicia Bouzas Pedreira do C.N. Galaico e bolseira do CGTD acadou o sétimo posto na proba de 1500 libre en categoría júnior de 16 anos.
Segunda xornada
Na segunda xornada do Campionato de España, Ana Cernadas González do C Fluvial de Lugo e bolseira do CGTD proclamouse Campioa de España Júnior de 17 anos, logrando un tempo de 1:03.85. Con esta marca, a nadadora do club lucense estableceu nas eliminatorias un novo récord Galego. Na final A absoluta acadou o sétimo posto.
Pola súa banda, Carla Carrón Muiña do C.N. Arzúa e bolseira do CGTD foi terceira en 50 libre júnior de 16 anos con un tempo de 27.16. No segundo día, Alicia Bouzas Pedreira do C.N. Galaico e bolseira do CGTD repetiu competindo e desta vez foi terceira en 400 estilos júnior de 16 anos con 5:02.17.
Ademáis, Rosalía Marín Martínez do C.N. Coruña e bolseira do CGTD foi cuarta en 100 costas júnior de 17 anos.