A nadadora Paula Otero Fernández do C. N. Arteixo e bolseira do CGTD de Pontevedra, foi terceira na proba de remuda mixta sub 19 no Campionato de Europa de Augas Abertas Júnior disputado en Paris.
Tal e como recolle a Federación Galega de Natación, Otero nadou a primeira posta do equipo de España que tamén integraban Ángela Martínez, Alejandro Puebla e Carlos Garach. O conxunto español desta proba de 5K rematou a poucas décimas do segundo clasificado.
Otero tamén competiu os 7,5K
Antes, o venres 23, Otero participou na proba de 7,5K. Segundo informa o CN Arteixo, esta foi “unha carreira trepidante. Paula estivo no grupo de cabeza durante máis da metade da proba, pero sempre moi presionada polas súas rivais máis duras, que se puxeron diante na segunda parte da carreira”. Finalmente, a galega rematou novena nesta competición europea.
O propio club resalta a aprendizaxe da súa deportista neste tipo de competicións tan esixentes, non só na piscina, senón na estratexia e a capacidade de tomar decisións.
