A Liga Feminina 2 (LF2) xa ten calendario, que dará comezo o 2 de outubro. A terceira categoría do baloncesto feminino español, despois da creación da LF Challenge, contará coa participación de catro equipos galegos: o CB Arxil, o Maristas Coruña, o Mariscos Antón Cortegada e o Institutos de Compostela – Xunta (Rosalía Fedesa).
Todos os clubs galegos competirán no grupo A, con equipos de todo o territorio español, algo que critican desde o club pontevedrés. O Arxil denuncia que deberá facer 23.000 quilómetros sumando todos os desprazamentos.
Lino López, do equipo de Pontevedra, subliña o maior desgaste económico e físico que deberán sufrir as xogadoras deste grupo da LF2, con longas viaxes que repercutirán nos orzamentos dos clubs. “A partida destinada a viaxes incrementarase nun 100%, mentres que todo o contrario ocurrirá no grupo B, con viaxes curtas, menos orzamento e máis descando”, critica.
As dificultades económicas afectan tamén ao Maristas Coruña, que está en busca de patrocinadores para sufragar os gastos da LF2.
O Maristas Coruña precisa un patrocinador para competir na LF2
As datas da LF2
Os rivais das galegas serán o Ingenia Solar Energy Costa, Unicaja, Milar Córdoba Baloncesto, Vega Lagunera Adareva Tenerife, Asisa Alhaurín de la Torre, Magec Tías, HGB Ausarta Barakaldo EST, BF León, Melilla Sport Capital La Salle e GDKO Ibaizabal.
O primeiro partido terá lugar na fin de semana do 2 de outubro, cos enfrontamentos Arxil – Alhaurín, Compostela – Adareva, BF León – Maristas e Cortegada – Córdoba.
Haberá que agardar ata a cuarta xornada para desfrutar dun derbi galego, co enfrontamento entre o Arxil e o Compostela, que terá lugar en terras pontevedresas.
O parón de nadal terá lugar entre a 12ª e 13ª xornada, a mediados de decembro, para retomar a competición o 8 de xaneiro e iniciar a segunda volta na fin de semana do 15 dese mesmo mes.
A derradeira xornada enfrontará ao Barakaldo co Maristas, o Cortegada co Unicaja, o Compostela co Córdoba e o Arxil contra o Adareva.
