O fútbol galego quédase sen representación na Copa da Raíña. Tanto o Dépor ABANCA como o PM Friol disputaron este mércores en casa os seus partidos correspondentes á segunda eliminatoria da competición e caeron derrotados ante os seus rivais.
As herculinas perderon contra o Granada CF por un 0-1, nun partido igualado que se decidiu nos intres finais. Non foi así en Friol, onde o equipo de Covi Regueiro perdeu por un 1-7.
Derrota branquiazul en Abegondo
O equipo dirixido por Miguel Llorente preparouse en Abegondo para recibir nesta eliminatoria de Copa ás andaluzas do Granada. Na primeira metade, ambos equipos pecaron de erros en ataque, xerando escasas oportunidades de gol.
O Dépor ABANCA a tivo primeiro no minuto 10, cun disparo de Carlota, que unha vez máis foi protagonista nas accións ofensivas branquiazuis. Tres minutos despois, as visitantes estiveron preto de anotar cunha internada de Laura Pérez, pero Sampalo despexou sen problemas mandando o balón ao córner.
No saque de esquina, o esférico entrou na portería, pero o árbitro sinalou un fóra de xogo nunha acción previa. As accións centrábanse no mediocampo, sen que ningún dos dous conxuntos liderara o partido. Pasado o ecuador da primeira parte, as andaluzas xeraron perigo na área coruñesa, pero o balón acabou en mans da cancerbeira herculina.
Uns momentos despois, tanto Adule como María Ruiz puideron anotar, pero non tiveron sorte. As ocasións alternábanse entre os dous equipos sen que o marcador se vira modificado.
Para a segunda parte, o Granada comezou dominando no céspede de Abegondo, pero pronto o Dépor ABANCA fíxose co control. Patri López realizou un bo disparo que porén marchou desviado e pouco despois o árbitro pitou un penalti a favor das galegas que non foi transformado.
María Ruiz tivo no 79 unha gran oportunidade de golear, recollendo un pase en profundidade de Eva Dios, pero Carol despexou acertadamente. Un par de minutos despois, Carlota tivo unha nova oportunidade, pero Andrea Romero evitou o tanto.
O único gol do partido e que determinaría o pase á seguinte fase da Copa da Raíña chegaría no minut o 84. O Granada aproveitou os espazos nas costas de Patri López, cunha Lauri que avanzou para darlle a asistencia a Patri Mascaró, quen non fallou ante Sampalo.
Final do #DéporABANCAGranada, 0-1, da #CopaDeLaReina en #Abegondo
🦋 #VoemosXuntas 💙 #MoitoPorVivir pic.twitter.com/uDXMW7fuIP
— RC Deportivo (@RCDeportivo) November 10, 2021
O Friol é goleado na casa
En Friol, a sorte tampouco acompañou ás galegas nesta xornada de Copa. Desde o primeiro momento, o Racing Féminas mantiña a raia ás locais, que xa no minuto 1 puxeron o 0-1 cun gol en propia porta tras un erro defensivo.
O segundo tanto das visitantes non chegaría ata o minuto 27, da man de Henar, e desde entón comezou o festival goleador das visitantes. No minuto 35, Camino anotaría o terceiro e xusto antes do descanso, Henar faría o seu segundo gol da tarde.
A segunda metade tamén comezou con superioridade cántabra, cun gol no 46 de Marina. O conxunto do Friol esforzábase sen éxito por remontar o partido e reducir ás rivais, e a loita tivo a súa recompensa nun gol no 65 de Alicia.
Porén, o primeiro gol galego non mudou a tónica do partido, e o Rácing Féminas seguiu liderando no encontro. Dez minutos despois, Princella faría o sexto e no 81 Mariajo encargaríase do sétimo e último gol.
Con estes resultados, os dous equipos galegos despídense por esta tempada da Copa da Raíña.
