Coa segunda xornada da fase de ascenso a Reto Iberdrola chega o momento da verdade para os equipos de Galicia en Primeira Nacional. Esta fin de semana será o primeiro desprazamento para eles fóra de Galicia, xa que o grupo 1A da primeira fase estaba formada por clubs irmandiños.
Este domingo, 18 de abril, Dépor ABANCA B, Victoria CF e Viajes Interrías deixarán a calor das súas casas para visitar en Asturias e Cantabria para enfrontarse a Racing Féminas B, Real Oviedo Femenino B e Gijón FF respectivamente.
O reto do Dépor ABANCA B
O que máis preocupa a Kevin Cabado, adestrador do Dépor ABANCA B, desta xornada é precisamente a adaptación do grupo a esta nova dinámica de desprazamentos, ao saír fóra de Galicia.
O partido do domingo ás 12:00 horas, fronte o Racing Féminas B, será un reto para o club galego, que xogará contra “o equipo mellor traballado do grupo 1A e 1B”, en palabras de Cabado. A clasificación pode enganar, xa que as cántabras son colistas, cun coeficiente de 1,667 puntos.
O adestrador branquiazul apunta a “xogadoras moi diferenciais”, como Laura Viñas ou Naiara, que forman parte da dinámica do primeiro equipo.
Tamén o Dépor ABANCA B ten xogadoras ás ordes de Manu Sánchez. Precisamente esta fin de semana, no partido que enfrontaba ao primeiro equipo co FC Barcelona, ata seis xogadoras do filial foron convocadas. Isto supón tamén un hándicap para o adestrador do B, que porén prioriza o debut das futbolistas co primeiro equipo aos resultados.
Kevin Cabado: “O noso maior logro é que debuten en Primeira División”
Para este encontro, Cabado poderá facer fronte ás baixas grazas á profundidade do seu plantel. “De feito, este ano debutaron máis de 30 xogadoras co B e as que vaian estarán preparadas para competir e merecer gañar”, salienta. A teoría está clara: “É o que lles digo eu, gañar pode gañar ou non, porque o fútbol é caprichoso, pero hai que ir alí e merecer gañar”.
O Victoria CF enfróntase ao actual líder
O segundo partido da xornada é o do Victoria CF que adestra a galega Cris Oreiro. As cebras visitarán ao líder, o Oviedo B, ás 12:30 horas, un rival que ven de encaixar unha goleada ante o Dépor ABANCA B na primeira xornada.
Precisamente este feito é o que fai saltar as alarmas da adestradora. “Sairán con máis ganas que se houberan gañado ou se tiñan encaixados menos goles”, advirte.
A nivel táctico, Oreiro prevé un partido bonito, xa que o Oviedo “ten un xogo combinativo que vai ser definitorio, non só como compita, senón como definas o teu xogo propio”.
Na primeira xornada houbo vitoria das cebras, cun 2-1 ante o Gijón, e coa enerxía da vitoria actuarán como visitantes en Asturias ante o Oviedo. Xogar fóra da casa e lonxe de Galicia pode ser ata un factor a favor das coruñesas, xa que son o equipo máis forte como visitante, perdendo só un partido así nesta tempada. “Xogar fóra da casa vennos ben, somos boas visitantes e creo que imos gañar”, afirma Oreiro.
Cris Oreiro: “Vivímolo con moito traballo, pero con moita ilusión, intentando mellorar cada semana”
O partido das incógnitas, para o Interrías
A xornada para os equipos que representan a Galicia nesta fase competitiva remata co Gijón – Interrías ás 17:00 horas. O adestrador galego, Luís Treviño, prevé un duelo difícil, ante “un rival complicadísimo”.
O técnico alaba ao seu homólogo no banco rival, xa que afirma que “Martín imprime moitísimo carácter ás xogadoras”. Outro factor a ter en conta será o campo, xa que o conxunto asturiano conta cunha apaixoada afección.
O tema do desprazamento tamén preocupa a Treviño, que viu como o seu equipo venceu na primeira xornada en casa, pero non ten claro como se adaptará o seu plantel á viaxe. “Vai ser o noso primeiro desprazamento en todo o ano, hai que ver como nos adaptamos. Son moitas incógnitas que temos que ir despexando. Traballaremos para ir despexando algunhas e aclimatando outras e gañar en Gijón“, sentencia.
