Co gallo do 8M, foron varios os concellos galegos que quixeron recoñecer o labor e o papel do deporte feminino na sociedade, apoiando distintas iniciativas ou destacando ás súas deportistas.
Nesta xornada de reivindicacións, municipios como Santiago de Compostela, Lugo, Bergondo, Vimianzo ou Ourense recordaron a estas referentes para nenas e nenos e toda a sociedade.
Santiago de Compostela
Para o Día Internacional da Muller, o Concello de Santiago de Compostela celebrou un acto no que recoñeceu o labor pola igualdade de distintas mulleres e colectivos da cidade, baixo o lema “Mulleres de Compostela”.
Alí estivo Ruth Lorenzo. A karateka proclamouse recentemente subcampioa de España de Karate e estivo entre as mulleres homenaxeadas por contribuír cada día “a construír unha cidade máis igualitaria, máis social e máis humana”.
No seu perfil de Instagram, a deportista asegurou sentirse “afortunada de recibir un recoñecemento coma este, consciente de que moitas foron olvidadas, sabendo que actualmente moitas son invisibilizadas”. “A revolución será feminista ou non será”, concluíu.
Ver esta publicación en Instagram
Lugo
En Lugo tamén houbo homenaxe a distintas mulleres, na que foi a vixésima edición dos premios Entre Mulleres. Neste caso, a deportista recoñecida foi Adi Iglesias, atleta paralímpica, á que califican de “raio dourado” cos seus distintos éxitos nas pistas deportivas.
En 2021 proclamouse bicampioa de Europa en 100 e 400 metros T13, reafirmándose, no tartán do Estadio Olímpico de Tokio, como unha das mellores deportistas españolas, capaz de superar en cada competición as súas marcas persoais.
Desde o Concello destacan a Adi Iglesias como “exemplo de valentía e superación é todo un referente para a mocidade lucense, pola súa tenacidade e perseveranza, e polos seus logros cos que, ademais, está a contribuír a outro obxectivo moi importante: dar visibilidade ao deporte adaptado”. Na súa representación recolleu este premio a súa nai, Lina Iglesias.
Ver esta publicación en Instagram
Bergondo
Outro dos concellos que adicou a xornada a recoñecer a importancia do deporte feminino foi Bergondo. Alí o 8M chegou cunha serie de actividades baixo o lema ‘Elas tamén levan o 8’ e tamén unha ‘Andaina pola igualdade’ prevista para o sábado 12 de marzo.
O papel da muller no mundo do deporte, tema do Concello de Bergondo para este 8M
Vimianzo
No Día da Muller, Vimianzo apoiou ao equipo de fútbol amateur do municipio cunhas camisetas conmemorativas da data. Co logo de igualdade, e unha campaña que incluiu un vídeo, as rapazas do club reivindicaron o fútbol e o deporte feminino.
O club leva en funcionamento xa máis de catro anos, sendo un referente na Costa da Morte e “marcándolle goles á desigualdade, conseguindo que as mulleres non queden fóra de xogo”.
Ourense
Outro dos concellos que se sumou a estas iniciativas foi Ourense, coa colaboración do Cidade de As Burgas. O equipo de fútbol sala presentou coa súa capitá, Sonia Pacios, a súa nova equipación de cor morada coa que xogará os seus partidos deste mes.
Ver esta publicación en Instagram
A Coruña
Para o vindeiro 26 de marzo, A Coruña súmase aos concellos que unen deporte e igualdade coa II Andaina Solidaria #ImportaEMoito, que forma parte da súa campaña polo Día Internacional da Muller.
A andaina, que se celebra coa X Carreira Popular Hércules, dará comezo ás 17:00 horas. As persoas participantes levarán o dorsal 261, en homenaxe ao que levou a primeira muller que correu con dorsal nunha maratón, Kathrine V. Switzer.
Os donativos para esta acción solidaria realizaranse a través da web oficial de Coruña Corre e serán de 3 euros, 5 euros ou cantidades superiores. As persoas participantes recibirán un quentador de pescozo conmemorativo.
