Na pasada da fin de semana, Lleida foi a localización escollida como sede do XIX Campionato de España de Grupos Show Grandes e Pequenos, onde competiron sete clubs galegos.
Na categoría de Show Grandes participaron seis clubs en representación de Galicia, quedando o CARPA Grupo Viqueira na mellor posición, no sexto posto, co espectáculo ‘Colgados’.
O seguinte club de patinaxe galego na clasificación foi o CPA Valladares, con ‘Smog’, quedando unha posición por debaixo, na sétima. Como noveno clasificado quedou o CP Ribeira, con ‘Esgos 1844’.
Ver esta publicación en Instagram
Pola súa parte, CPA Ribex foi décimo con ‘A su merced’, mentres que o CP Porriño quedou duodécimo con ‘Reina de corazones’ e o Club Ánfora foi decimoquinto con ‘Tráfico’.
Na outra categoría, o Show Pequenos, o Ánfora foi sétimo, con ‘Adicción’, e o CPA Condado rematou na duodécima posición con ‘Detrás de la piel’.