O Durán Maquinaria Ensino afronta esta semana unha cita histórica no calendario. O Pazo acollerá este xoves 30 a eliminatoria entre o equipo de Miguel Ángel Ortega e o italiano Magnolia Campobasso. O adestrador das galegas é consciente das dificultades, pero afirma contundente que “son moi optimista e confío moito no equipo”.
O cadro das lucenses tivo un comezo de pretempada accidentado, cargado de lesións que impiden que o grupo adestre ao completo. “O plantel non está nas mellores condicións posibles. Tivemos unha pretempada complicada e estamos a ter un inicio da mesma maneira”, apunta o preparador.
Neste sentido, a afección aínda non poderá ver a Alba, unha das xogadoras máis destacadas da ida, e a Tamara no Pazo, “pero son cousas que pasan cos equipos. Hai que afrontalo como equipo e sabendo que hai que multiplicarse e facer un esforzo extra”.
O Campobasso, un rival máis coñecido
Despois de ter xogado a ida en terras italianas ante o Magnolia Campobasso, as lucenses do Ensino xa non terán que facer fronte a un rival descoñecido e aos nervios de estrearse na competición europea.
“Agora temos unha idea moito mellor do partido”, apunta Miguel Ángel Ortega. “Loxicamente, unha vez compites as coñeces moito mellor e na medida na que as vas coñecendo tes unha idea máis clara de como enfocar o partido”, engade.
Malia as ausencias que terá no seu banco, Ortega asegura que está tranquilo xa que o seu conxunto “como podedes ver é un equipo que ten moita ambición, moita ilusión e hai unha entrega máxima, unha boa cohesión de equipo. Ás veces, se non podemos estar todas hai que agarrarse a estas cousas”, explica.
Nesta liña, o adestrador admite que a falta de referentes na pista como Alba pode modificar a idea de xogo, pero “todas son importantes”. Por ese motivo, o adestrador quixo ter unhas palabras de admiración ás súas pupilas, citando nomes como Helena Oma, María Eraunzetamurgil ou Sofia da Silva, “que están xogando moitos partidos mermadas porque arrastran pequenas lesións e están facendo moi bo traballo”.
Miguel Ángel Ortega: “As xogadoras que non se borran cando non están nas mellores condicións creo que son moi importantes para un equipo”
“Hai que darlle valor. Para min ten máis importancia o feito de que non se borren, dicir non estou ben e ao mellor non podo adestrar ben, pero o día do partido estou. Estas xogadoras son xogadoras ás que hai que darlle moito valor e importancia. As xogadoras que non se borran cando non están nas mellores condicións creo que son moi importantes para un equipo. É un exemplo moi grande”, asegurou.
No partido de ida do clasificatorio da EuroCup, a defensa do Ensino foi clave para impedir que o Campobasso collera ritmo e se marchara no marcador. O muro das galegas permitiu rozar a remontada e rematar finalmente o encontro só un punto por debaixo.
Miguel Ángel Ortega: “Mantivémonos xuntas en defensa e iso faime sentir moi ben”
Adaptándose a un novo reto
Porén, Miguel Ángel Ortega recoñece que “o plan inicial non foi o mellor”. Do partido en Campobasso recorda que “unha vez pasamos por vestiarios fixemos unha serie de cousas que axudaron ao equipo, non hai que dar moitas pistas, pero enfocamos o partido doutra maneira e creo que o equipo cambiou radicalmente e iso vénnos mellor. Imos intentar ver que respota teñen elas e seguir ese camiño”, expón de cara ao duelo de volta.
Ortega: “Temos que saír a gañar, gañar ou gañar, non hai outra”
Malia estar a só un punto por debaixo, o míster sinala a importancia de dalo todo e non confiarse: “Cando viñamos da volta falabamos dalgunhas experiencias que tivera eu, cando nunha eliminatoria, unha vez sacamos un resultado favorable unha diferenza de 11 puntos e nun momento dado do partido estás pensando en máis cinco, menos cinco… E iso ás veces afecta moitísimo. Agora iso non o imos ter, porque sabemos que temos que ir a gañar. Non hai mal que por ben non veña, xa non temos a tontería de estar pensando nisto. Este tema se acaba e nós mañá temos que saír a gañar, gañar ou gañar, non hai outra”.
O efecto Pazo
Para lograr esa ansiada vitoria, o Ensino estará arroupado pola súa afección no Pazo. O adestrador tamén recordou a importancia do público nos partidos, lembrando que o equipo tivo “un apoio incondicional, cando peor estiveron”.
Como é habitual, sinala, “o público empúrrate, presiona a arbitraxe e iso é moi imoprtante loxicamente”. A isto engádese “a alegría de que cada vez poidamos volver a unha normalidade. Ver en Campobasso o pavillón practicamente cheo, non é que te alegre, pero dis, isto volve a ser o que foi”.
Miguel Ángel Ortega: “É un acontecemento moi bonito de vivir. O seu apoio vainos axudar moitísimo”
Ortega tamén lanzou unha mensaxe á afección, subliñando que o partido “é un acontecemento moi bonito. Tocounos vivir un momento histórico neste equipo, neste club que está en crecemento. Conseguiu o ascenso e seguiu medrando en liga feminina e agora está enr Europa. Pasamos á historia do club. É un acontecemento moi bonito de vivir. O seu apoio vainos axudar moitísimo”, rematou.
Este será un partido especial para o Ensino e para Lugo, que verá como un dos equipos da súa cidade se mide ante outro dos mellores clubs de Europa.
Manuel Durán: “O Ensino está facendo un gran esforzo para levar o nome de Lugo e Galicia por Europa”
