O Durán Maquinaria Ensino regresa do parón de seleccións co seu plantel aínda tocado, pero coa mente posta en sacar proveito do enfrontamento ante o Perfumerías Avenida. “É posible facer un partido que nos axude a seguir mellorando como equipo”, asegura o adestrador, Miguel Ángel Ortega, sobre o duelo deste xoves ás 20:30 horas.
A oitava xornada da LF Endesa obriga ás galegas a desprazarse a Salamanca para xogar contra o líder da máxima categoría, un Avenida que aínda non coñece a derrota. O encontro poderá seguirse vía streaming no Canal FEB.
Día de partido ‼️‼️‼️‼️@CBAvenida 🆚 @EnsinoLugoCB
⏰ 20.30
🏟WÜRZBURG
📺 Canal FEB
📲 Twitter @EnsinoLugoCB pic.twitter.com/ywjTF2MPMl— Ensino Lugo (@EnsinoLugoCB) November 18, 2021
Sesións de traballo durante o parón
Aproveitando as dúas semanas sen competición ligueira, Ortega puido adestrar con cinco xogadoras “en termos físico-técnicos”, con outras dúas baloncestistas do plantel nas súas seleccións e o resto con traballos de fisioterapia e recuperación.
“No momento no que recuperamos ás xogadoras que estaban coas súas seleccións, Geo Bahí e Sofía con España e Portugal, a partir de aí puidemos facer algún adestramento”, explica o técnico.
A enfermería do Ensino
Aínda tocadas están Tamara Abalde e María Eraunzetamurgil, que serán baixas de longa duración. Cun pronóstico máis favorable está Helena Oma, “que estará un mes fóra”. A mellor noticia é a de Alba Prieto, que poderá volver ás ordes de Ortega “senón esta semana, a que vén”.
Natalie Van den Adel tamén se atopa entre algodóns, pero pouco a pouco vai recuperando ritmo, segundo informou o adestrador.
Un rival duro para a volta
“Salamanca é un equipo que perde poucos partidos na tempada. É un partido moi difícil, aínda estando todo o mundo ben”, advirte o preparador. Porén, isto non mina a moral do Ensino, xa que Ortega está convencido de que “é posible facer un partido que poidamos aproveitar para seguir mellorando”.
O Perfumerías Avenida ocupa a primeira posición cun pleno de triunfos, acumulando xa 14 puntos. Pola súa banda, as lucenses son undécimas, con 10 puntos obtidos en tres vitorias e catro derrotas.
