En Lugo haberá un novo adestrador para a seguinte tempada en LF Endesa. Miguel Ángel Ortega colle as rendas do primeiro equipo do Durán Maquinaria Ensino.
O técnico catalán recala no banco lucense ilusionado polo proxecto, nun equipo do que asegura que “a imaxe externa que ten é de progresión”. Por iso, Ortega chega coa intención de poder “colaborar e dar un impulso máis. Creo que é un club en crecemento, onde a directiva tamén ten gañas de impulsarse e seguir crecendo”.
O presidente do Ensino, Manuel Durán, recoñeceu na súa presentación a traxectoria do adestrador, subliñando a súa etapa co Perfumerías Avenida, co que conquistou dous tripletes consecutivos de Liga, Copa e Supercopa entre 2016 e 2018.
Manuel Durán (presidente): “Para nós é un paso adiante poder contar cun adestrador desta traxectoria”
“Para nós é un paso adiante poder contar cun adestrador desta traxectoria, que creo que nos pode axudar na próxima tempada para intentar mellorar a clasificación”, declarou o dirixente. Desde a directiva do Ensino, a meta está en competir en Europa: “Despois de tres anos na Liga e estar asentados, o toque que falta é ir a Europa”.
As lucenses teñen posibilidades de disputar a Eurocup, pola súa sétima decisión e co Valencia Basket disputando a Euroliga. Porén, é unha decisión aínda pendente da FEB e da FIBA.
Un club de “impulsos”
“É un club que ven de dous impulsos”, resume Ortega, sobre o momento no que colle o mando do Ensino. Para a tempada 2021/2022, a meta será “seguir impulsando”.
O novo adestrador alaba o traballo dos seus predecesores, Juan Nécega, técnico do ascenso, e Carlos Cantero, que consolidou ao equipo na máxima categoría. Agora é o seu turno: “Juan no momento do ascenso, Carlos colleu o relevo e agora eu, para seguir o impulso”.
Miguel Ángel Ortega: “O obxectivo é facelo mellor que antes. Diso se trata”
“Isto é algo competitivo e todos queremos competir. O obxectivo é facelo mellor que antes. Diso se trata”, resume Ortega. O catalán engade que esta traxectoria ascendente do Ensino é a súa máxima motivación, xa que considera o crecemento como a base do club.
Manuel Durán: “Estamos apostando por un perfil de xogadora xoven”
Miguel Ángel Ortega, un galego de adopción
Así mesmo, Ortega estará preto de casa. Malia ser catalán, a súa muller e fillos son galegos, polo que “me considero un galego máis”.
Coa súa nova posición en Lugo, o adestrador admite estar encantado por poder traballar preto da casa, pero aclara que esa non foi a razón pola que decidiu formar parte do Ensino.
Miguel Ángel Ortega: “Veño a un sitio en crecemento e é unha motivación moi grande”
“Estou aquí para gañar partidos e porque creo no que dicía antes, ven de Juan, un impulso, recordo aquela fase en Valencia o ben que se fixo e a imaxe que deu o club. Logo recordo a Cantero, que creo que fixo moi bo traballo tamén, e o equipo foi progresando. Veño a un sitio en crecemento e é unha motivación moi grande”, especifica.
