O pase á fase de grupos da EuroCup entre o Durán Maquinaria Ensino de Miguel Ángel Ortega e o Magnolia Campobasso segue no aire. As galegas perderon por un axustado 65-64 en Italia, polo que cunha vitoria de dous puntos en Lugo poderán clasificarse.
Á fin do encontro, o adestrador das lucenses destacou do seu equipo que “nos mantivemos xuntas en defensa e iso faime sentir moi ben”. As visitantes acusaron os nervios na primeira parte do partido, con moitas imprecisións baixo o aro, pero lograron recompoñerse na segunda metade, axustando o resultado final.
Na rolda de prensa tamén estivo presente Alba Prieto, a máxima anotadora do Ensino, quen mira xa ao próximo partido asegurando que “temos que manter a calma e xogar os seguintes 40 minutos en Lugo da mellor forma que saibamos. Estamos emocionadas por xogar o vindeiro partido”.
Dúas caras no partido
No seu análise do encontro, Ortega admitiu que se puido ver sobre a pista a dous Ensino distintos, un na primeira parte, dominado polos nervios do debut na EuroCup, e outro na segunda, loitador e máis certeiro baixo o aro. “Na miña opinión a actitude foi moi boa en todo o partido e o baloncesto foi moi bo na segunda parte”, aseguraba.
Ortega: “Afortunadamente no terceiro e cuarto cuarto o equipo xogou o baloncesto que pode xogar”
“Obviamente foi un partido de dúas caras. As porcentaxes de tiro na primeira parte foron moi baixas. Estaba todo o mundo moi nervioso. Afortunadamente no terceiro e cuarto cuarto o equipo xogou o baloncesto que pode xogar. Xogadoras como Alba Prieto empezaron a tirar, a empurrar ao equipo, a transmitir confianza e tomar responsabilidade”, apuntou o preparador.
Ortega: “É moi difícil facer un esforzo cando non estás atacando ben. Ten moito valor”
A clave, segundo apunta Ortega, estivo na defensa. “Con esas porcentaxes, se non defendes podes estar facilmente 20-30 puntos abaixo. O esforzo do equipo foi moi bravo. É moi difícil facer un esforzo cando non estás atacando ben. Ten moito valor”, engadiu.
Pola súa banda, Alba Prieto considera que para o partido definitorio, a intensidade e a constancia serán a chave. “É unha experiencia moi nova para a maioría de nós, pero creo que hoxe fixemos un bo traballo durante 20-25 minutos e temos que aumentar o nivel para os 40 minutos”.
As impresións das italianas
Pola sala de prensa pasaron tamén Sabatelli, técnico italiano, e Nina Premasunac, xogadora do Magnolia Campobasso. Ambos declararon ante os micrófonos as súas impresións da vitoria local neste partido.
O técnico das italianas admitiu que a reacción do Ensino na segunda metade do partido era esperable, polo que non pillou por sorpresa ao Campobasso. Porén, quixo felicitar ás súas pupilas, das que salientou que “non se renderon nin nos momentos de dificultade. Fixemos equipo, estamos traballando nisto desde o comezo e loitamos ata o último balón. Finalmente, o resultado rematou ao noso favor nesta xornada histórica. Felicito ás xogadoras por facer algo incríble e extraordinario”.
Nas terras italianas están de celebración coa primeira vitoria acadada, pero a xogadora Premasunac fixo un chamamento á calma: “Temos que manter os pés na terra, porque este foi só o primeiro partido e temos moito traballo por diante. Se perdemos en España é coma se non fixeramos nada. Temos que concentrarnos e mirar ao seguinte partido, poñer a máxima concentración no vindeiro duelo porqeu é moi importante para nós xa que queremos xogar a EuroCup“.
Na súa análise do partido, a croata apuntou que “este partido era moi importante para ambos equipos, por iso sentimos a presión. Comezamos con moito nerviosismo, podíase ver en ambos equipos que tivemos unha porcentaxe de tiro moi baixa, e o descanso chegou cun número baixo de puntos, o que é raro, pero estabamos nerviosas, o que é normal”.
Premasunac asegura que neste partido “a clave foi a presión”. As italianas tiveron problemas para lidiar coa presión galega, e para o partido de volta centrarán os seus esforzos en saber xestionala, así como en “non deixarlles tiros fáciles”.
Pola súa parte, Sabatelli seguiu alabando ao seu plantel, tanto ás xogadoras máis veteranas como ás novatas, asegurando que “este equipo demostrou esta noite ter un grandísimo carácter, o que me fai sentir orgulloso”, demostrando a súa confianza non só nas estrelas do equipo, senón na base.
Coincidindo coa súa xogadora, o preparador asegurou que “a defensa debe ser a nosa arma para xogar en velocidade e ter máis harmonía en ataque, que agora aínda nos falta, pero é normal, porque o equipo cambiou totalmente e precisamos tempo”.
“Adicamos a vitoria non só á cidade, non só á rexión, senón tamén a toda a sociedade que esta semana fixo un trabllo incríble para este día que para nós foi impecable”, rematou o adestrador. A croata engadiu que “o máis bonito é vencer”, pero insistindo en que “debemos manter os pés na terra e esperar ao seguinte partido”.
