“Somos dous proxectos ilusionantes e os dous clubs estamos intentando facer as cousas ben, cun proxecto con xente xove e sen volverse locos economicamente, baseando todo no traballo. Creo que iso é moi importante para o baloncesto galego”, declarou este venres en rolda de prensa Miguel Ángel Ortega, adestrador do Durán Maquinaria Ensino, na previa do derbi galego ante o BAXI Ferrol.
Lucenses e ferrolás veranse as caras este sábado na pista das segundas, a Malata, un escenario que Ortega define como “fabuloso e cargado de historia de baloncesto. É un marco que me fai moita ilusión”.
O propio preparador explicou que “teño un recordo moi bonito (de Ferrol), unha parte da miña vida estivo alí e creo que vai ser un bo partido. Estamos con moitas ganas de xogar”.
O Ensino comeza a ter un equipo formado
Con María case recuperada da súa lesión e Helena Oma en proceso, o Ensino xa está máis preto de mostrar a imaxe que modelou na pretempada. Agora, Miguel Ángel Ortega ten a súa disposición un banco máis amplo de xogadoras, polo que comeza a funcionar “a idea de rotar, estar intensas e ter un xogo. Imos enfrontarnos máis de ti a ti cos rivais e é máis satisfactorio poder adestrar mellor. Todo o mundo anímase máis”.
Ortega: “Imos enfrontarnos máis de ti a ti cos rivais”
Así, cara o derbi, o adestrador confesa que “Oma xogará uns minutos”, de maneira que o club de Lugo comeza “a ter o equipo que pensamos en agosto”. A entrada de novo na pista dunha das xogadoras claves no equipo “é un estimulo moi grande” para un plantel que ve como pouco a pouco as lesións quedan atrás e chegan reforzos.
Con este novo panorama, “o equipo fortalécese e a nosa ilusión é ver se a partir de xaneiro podemos mostrar o equipo que pensamos no verán”, engade.
Rival duro para o derbi
Para o derbi irmandiño, o Ensino terá un rival duro, un BAXI Ferrol que se caracteriza pola constancia, en palabras de Ortega. Das rivais e anfitrioas deste duelo, o preparador sinala que “como cada tempada, os qeuipos de Lino, de menos a máis van medrando e Ferrol sempre ofrece unha consistencia, non só en ataque, senón tamén defensivamente cada vez mellor”.
O técnico insiste en que “polo que coñezo a Lino e a traxectoria dos seus equipos, sempre é un conxunto a ter moi en conta porque é un equipo que durante a tempada vai medrando e iso quere dicir que fai un bo traballo. Iso é común en Ferrol e faino perigoso”.
Entre os antecedentes máis recentes entres estes dous clubs están os derbis disputados en pretempada, na Copa Galicia, que gañaron as ferrolás, e no I Torneo Cidade de Narón, con outra vitoria para o BAXI.
Lino López: “É unha boa ocasión para desfrutar dun derbi galego nunha das mellores ligas de Europa”
“Elas xogaron mellor neses dous partidos. No amigable fumos con junior, fumos porque estaba pactado pero a nosa situación era moi dificil. Na final da Copa Galicia estabamos mellor en termos de efectivos, pero elas xogaron mellor”, recorda Ortega.
Ortega: “O interese mediatico é moi importante para mostrar o noso deporte, hai que velo en positivo”
No relativo ao horario, a afección poderá desfrutar do derbi galego desde as 16:00 horas, un horario non moi favorable ás xogadoras, pero que o adestrador acepta porque “hoxe en día estás en mans da televisión e eu estou encantado de que se dea pola televisión. Sen ter que ser ás catro, pois ás catro. Aínda que non é o mellor, o interese mediatico é moi importante para mostrar o noso deporte, hai que velo en positivo”.
