O 25 Rallye A Coruña rematou con sentimentos encontrados para as compoñentes do Melmac Rally Factory. O coche de Ruth Ortega non rematou a competición, pero si o fixo o de Leti López. A primeira delas declara que “estamos contentas, pero por outra parte tristes por non ter podido rematar”.
Leti López debutou na proba acadando a 78ª posición da competición e a primeira na Open Gadis Donas. Pola outra banda, Esther Gutiérrez finalmente non puido participar no campionato, polo que a copiloto Laura González ocupou o seu lugar xunto a Ruth Ortega.
O tramo de Coirós, a cruz do Melmac Rally Factory
O 206 de Ortega caeu no tramo de Coirós, como xa temía a propia piloto na previa da competición. “É un tramo moi complicado, técnico, pero tamén considero que é perigoso”, explicaba a galega antes da proba.
Ruth Ortega: “Víao vir e é certo que a medida que pasábamos o tramo víamos coches en cada sitio tirados e rotos”
Cando ela e a súa copiloto Laura González corrían neste treito, a caixa do coche rompeu. “Víao vir e é certo que a medida que pasábamos o tramo víamos coches en cada sitio tirados e rotos. Para nós era moi difícil rematar ese tramo, foi unha zona rápida que estaba moi rota. Arrisquei e igual non tiña que telo feito, pero son cousas que pasan. Esas caixas son de serie e son moi delicadas e supoño que non será nin a primeira, nin a última”, explica a piloto.
Ver esta publicación en Instagram
Claros e escuros no 25 Rallye A Coruña
Non todo foi negativo na proba coruñesa. Laura González corría por primeira vez como copiloto de Ortega e malia as dificultades de competir sen ter adestrado, “fíxoo moi ben. Ata que o coche non deu ningún problema fumos moi contentas”.
Entre os treitos que si puideron disputar está o de Aranga, o máis especial para a galega, xa que é o máis achegado á súa casa. “Fixemos a primeira pasada e moi ben, moi contentas. Aí foi onde probamos o coche. De feito, foi o único tramo que conseguimos facer enteiro e moi ben”, recorda.
No outro coche do Melmac Rally Factory, conducido por Leti López e con María Martínez no asento de copiloto, a penúltima posición da táboa non quita mérito ao debut da piloto.
Ruth Ortega: “Leti estivo con altibaixos todo o rally. Os nervios son moi complicados nun rally tan difícil e o coche non ía como tiña que ir tampouco”
“Leti estivo con altibaixos todo o rally. Os nervios son moi complicados nun rally tan difícil e o coche non ía como tiña que ir tampouco. O importante é conseguir rematar un rally difícil, así que está moi ben”, declara Ruth Ortega sobre a súa compañeira.
O tramo espectáculo disputouse en Bens
Neste 25 Rallye A Coruña non houbo competición nocturna, habitual noutras edicións. Este tipo de percorridos son moi bonitos para o público, pero máis perigosos para as deportistas. “A min persoalmente non me gusta nada correr de noite, pero é certo que é moi bonito. O que fan en Ferrol está moi ben”, recorda Ruth Ortega.
O que si houbo foi tramo espectáculo, que tivo lugar en Bens. Por parte do Melmac Rally Factory só o coche de Leti López circulou polo treito, mentres que o resto do equipo agardaba na asistencia. “Non puidemos ir ao tramo espectáculo a velo porque estabamos agardando a Leti, xa que era a única que tiña esperanzas de rematar. Pero dixéronme que estivo moi ben”, explica a piloto.
🏎️ Achégase a segunda pasada ao tramo espectáculo de Bens que poñerá fin ao 25 #RallyeACoruña‼️
Lembra: sigue as indicacións da organización, con distancia de seguridade interpersoal e máscara. E broooooom!!🏁@RallyeACoruna#RallyeDeACoruña pic.twitter.com/aOLYfS0L9W— A Coruña Deportes (@coruna_deportes) May 29, 2021
Coa vista posta na seguinte proba
Ruth Ortega volverá a poñerse ao volante en dúas semanas, no Rally de Pontevedra, entre o 18 e o 19 de xuño: “É a segunda proba do campionato galego, na que puntuamos no Volante FGA, Beca e Open Gadis Donas“.
A piloto galega ten clara a súa meta: “A miña idea é que o coche aguante, intentar levarme o premio Donas e facelo o mellor posible, aínda que hai moitísimo nivel este ano”.
