O Durán Maquinaria Ensino xoga esta tarde ante o Kangoeroes Mechelen, nun novo partido de Eurocup no que as lucenses deberán gañar para pasar de fase. “Todas temos moita ilusión por seguir competindo en Europa e chegar o máis lonxe posible, pero xogar dobre competición na situación na que estamos non é o mellor”, apuntou o adestrador, Miguel Ángel Ortega.
O equipo das galegas viu minadas as súas forzas desde comezo de tempada, con lesións constantes que foron acortando o plantel dispoñible para o preparador. As lesións de máis longa duración son a de Tamara Abalde e Helena Oma, mentres que outras como Alba Prieto e María Eraunzetamurgil están a incorporarse na disciplina de traballo paulatinamente.
Ortega: “Aínda que fisicamente non nos vería ben, emocionalmente a todas faríanos moita ilusión”
O adestrador explica que “vainos vir ben seguir na competición e gañar este partido, porque nos poñería na seguinte fase. Iso, aínda que fisicamente non nos vería ben, emocionalmente a todas faríanos moita ilusión e a ilusión é a primeira condición que se ten que dar para poder competir ben”.
Unha final
O partido deste xoves ante as belgas é unha final para as galegas. De non gañar, o Ensino quedaría eliminado da competición europea. No partido de ida, a vitoria foi para o Kangoeroes por un 50-69.
Nese encontro, Ortega tivo que xogar con seis baloncestistas, que o deron todo nos corenta minutos pero só tiveron forzas para competir na primeira metade. Para este segundo asalto, o adestrador apunta que “temos claro que hai unha idea de partido que a elas lles pode vir mal e a nós moi ben”.
O problema no Ensino é dispoñer dun plantel curto de efectivos, que impide “manter esa intensidade que a elas lles vén tan mal. Imos intentalo”. A clave estará na dosificación do xogo das galegas.
Sobre o rival, Ortega asegura que “son un equipo con moito talento, con boas tiradoras, e niso teñen vantaxe. Se estás enriba e lles fas xogar a unha velocidade de 75 ou 100 por hora, xa non tiran igual”.
Ortega: “O que máis me preocupa é non poder adestrar normalmente”
Por iso, o que máis lle preocupa ao técnico é precisamente a escasa preparación das súas xogadoras: “O que máis me preocupa é non poder adestrar normalmente e preparar como sería o normal nun equipo profesional. Levamos poucos adestramentos. Cando tiñamos a ilusión de adestrar no parón ao final quedamos catro ou cinco mozas. Demasiado tempo sen poder traballar ben. É o que nos tocou vivir, pero é a única preocupación que teño”.
Aquí nos jugaremos el pase en la @EuroCupWomen esta tarde ‼️‼️
LUGO POR EUROPA 🇪🇺🇧🇪@KangoeroesB 🆚 @EnsinoLugoCB
🕢 20:30 h.
🏟 Winketkaai – Mechelen 🇧🇪
📊 https://t.co/nsV3yIaX3h
📺 https://t.co/bqEWKCd0cT pic.twitter.com/cxaFhxpPjn— Ensino Lugo (@EnsinoLugoCB) November 25, 2021
En busca da vitoria
Nas últimas citas, o Ensino non foi quen de sumar unha vitoria, perdendo na LF Endesa ante o Perfumerías Avenida e Lointek Gernika. Ambos foron rivais de alto nivel, e así o recordou o adestrador en rolda de prensa: “Perdimos polo rival claramente. Salamanca está a un nivel de intensidade espectacular e o Gernika tamén é un dos equipos fortes da liga. Para poder competir temos que estar todas, ben adestradas e estar moi ben e así tampouco sería fácil intentar gañarlles. Os rivais son os que son e nós quizais non temos a preparación suficiente en todos os termos. Non estamos adestradas como deberiamos a estas alturas”.
Miguel Ángel Ortega: “Non estamos adestradas como deberiamos a estas alturas”
Ortega fuxe de falar dunha mala dinámica no equipo, un termo que considera un “tópico”. “A dinámica importante é que non estamos traballando ben, cando comezemos a traballar ben comezaremos a gañar”, sinala.
O adestrador confía nas súas xogadoras, das que asegura que son “mozas con moita ilusión e ganas por facelo ben, con moito corazón e xente que pon todo. Iso é o importante, pero estas mozas non teñen a opción de prepararse ben”.
A baixa de Ferrari
Ao apartado de baixas no equipo sumouse recentemente a marcha de Paola Ferrari, quen deixa o club por motivos persoales para regresar ao seu país natal. O técnico tivo palabras de agradecemento para ela, recordando que “viu botar unha man”, e desexándolle “que vaia todo ben”.
Ante a posibilidade dunha sustituta, Ortega explicou que “a medida que recuperemos xogadoras non necesitaremos máis. Temos moita confianza no equipo inicial”
