O Durán Maquinaria Ensino de Ortega afrontaba este xoves a segunda xornada de EuroCup co Kangoeroes belga como rival no pazo. As lucenses, castigadas polas lesións e con só cinco xogadoras profesionais dispoñibles, perderon o encontro por un 50-69.
As visitantes, con máis rotacións, foron superiores ao longo do partido para levarse finalmente a vitoria. O adestrador local, Miguel Ángel Ortega, declaraba tras o encontro que este “foi un partido que se resume en termos de enerxía. Cando a enerxía desaparecía estivemos á súa mercé”.
Tocadas desde o inicio
Con baixas como as de Tamara Abalde, Natalie Van den Adel, Alba Prieto, Alessandra Orsili e María Eraunzetamurgil e outras xogadoras mancadas que malia iso competiron, como Helena Oma, o partido era un desafío para as lucenses.
O equipo de Ortega mantivo o tipo durante a primeira metade. O primeiro cuarto deixaba ver a superioridade das belgas, que vencía nos primeiros dez minutos por un 12-17.
No segundo cuarto, o Ensino revitalizouse e da man de Sofía da Silva e Marina Lizarazu conseguiu por primeira vez situarse por diante. Cunha brillante Paula Hoyuelos e os triplos de Aliaga, as locais lograban marchar aos vestiarios vencendo dun punto.
Para a segunda metade, as de Ortega acusaban a acumulación de minutos. Os esforzos titánicos das de Lugo non foron suficientes para dobregar ás visitantes, que aproveitaron o escaso fondo de banco das galegas para facerse co dominio do partido.
Para os últimos dez minutos, o duelo estaba practicamente sentenciado. Unha tímida reacción do Ensino fixo pensar nunha remontada, pero a falta de efectivos foi un obstáculo demasiado grande para evitar a derrota. O encontro rematou no 50-69.
O seguinte reto das lucenses será o xoves ante o Valencia Basket, onde milita a galega Raquel Carrera.
As impresións de Ortega e Diels tras o partido
Nas declaracións postpartido, o adestrador Miguel Ángel Ortega explicou que “mentres tivemos enerxía puidemos competir, estivemos no partido, pero a medida que pasaron os minutos e coas poucas opcións de rotacións, a intensidade delas impúxose”.
O plantel sofre cunhas rotacións tan escasas: “Se non as recuperamos, con 5 xogadoras e unha lesionada que sae por vontade é moi dificil competir así”, sentenciou.
Como contrapunto positivo estivo a participación da canterana Paula Hoyuelos, da que Ortega destacou que “saiu con moita enerxía e estivo moi ben. Foi a nota agradable, que unha moza da canteira se mostre no primeiro equipo. Estamos moi contentos por ela pese a derrota, porque ela sae reforzada”.
Ortega: “Foi a nota agradable, que unha moza da canteira se mostre no primeiro equipo”
Pola súa banda, o adestrador rival, Arvid Diels, fixo unha valoración positiva do encontro, non só pola vitoria, senón por ser o primeiro partido fóra de casa dun equipo xove.
Sobre o Ensino, o belga declarou que “é un gran equipo para a competición española e a EuroCup, pero coas lesións o adestrador ten poucas rotacións e nós o utilizamos para loitar. No futuro agardo que as súas xogadoras volvan o antes posible, porque teñen moi bo equipo”.
Galería fotográfica
FICHA TÉCNICA
Durán Maquinaria Ensino: Marina Lizarazu (8), Laura Aliaga (6), Georgina Bahí (2), Sofía da Silva (9), Chatrice White (9) —quinteto inicial—. Tamén xogaron: Helena Oma (8) e Paula Hoyuelos (8).
Kangoeroes Basket: Lut de Meyer (7), Ivana Katanic (17), Becky Massey (13), Billie Massey (8), Laure Resimont (19) —quinteto inicial—. Tamén xogaron: Ae’Rianna Harris (2), Eline Measschalck, Evan Van Gils e Marie Vervaet (3).
Parciales: 12-17. 20-14. 6-16. 12-22 (50-69).
Árbitro: Alexander Eger, Bert Van Slooten e Duhan Koyici.
Incidencias: Partido da Eurocup celebrado no Pazo dos Deportes de Lugo ante máis de medio centenar de persoas.