O Durán Maquinaria Ensino ten un óso duro de roer nesta xornada, na que visitan ao Valencia Basket. O equipo galego segue a recuperar efectivos, e o seu adestrador, Miguel Ángel Ortega considera que “cada semana imos estar un pouco mellor”.
O conxunto lucense conta xa con María e Helena Oma, pero o plantel aínda non está ao 100%. “Eu son optimista. Para xaneiro espero ter o equipo xa máis adestrado e que estea todo o mundo xa nunha dinámica normal. Cada semana imos estar un pouco mellor, a medida que poidamos adestrar como un equipo”, apunta o técnico.
Proba complicada para o Ensino
Porén, o Ensino aínda ten dous compromisos antes de que finalice o ano. O primeiro deles será este sábado ante o Valencia Basket ás 19:15 horas. Un rival da zona alta da táboa, pero que non contará con Raquel Carrera na pista. A galega está a recuperarse dunha lesión producida no partido ante o Casademont Zaragoza. Isto non será necesariamente un hándicap para as valencianas, xa que como apunta Ortega, “o plantel que teñen dálles para competir con baixas”.
Segundo o define Miguel Ángel Ortega, as taronjas son un conxunto de alto nivel: “Estamos falando dun equipo que é campión de Europa e que gañou a Supercopa nacional. Estamos falando de equipos grandes do baloncesto europeo. É un equipo moi dominante, que en todas as liñas está moi ben. É un plantel que ten xogadoras de moito nivel”.
Con todo, o adestrador aposta pola intensidade das súas, como xa fixeran no partido que as enfrontou hai unhas semanas: “Estivemos moi intensas, cunha intensidade de xogo alta, loxicamente naquel momento non tiñamos a todo o plantel e chegamos a onde chegamos. A posta en escena do equipo estivo moi ben, e competiu moi ben, pero para ese nivel, para mantelo durante moito tempo, fai falta ter a todo o plantel. Agora imos con Oma, e xa somos máis e algo poderán axudar”.
Tras o duelo o Ensino dirixido por Ortega descansará do 24 ao 26 de decembro, cando volverán á cancha para preparar o partido do día 28 contra o Araski.
