- As remeiras de Orio Orialki, gañan a Bandeira Cidade da Coruña de traiñeiras que en categoría masculina levou Bermeo Urdaibai. Na embarcación guipuscoana estaban as galegas Noa Viaño (Redondela), Vicky Piñeiro (Cangas) e Andrea Oubiña (O Grove).
- No barco de Arraun Lagunak vogaron Cristina Simoes (Vigo), Beatriz Piñeiro (Cangas), Alejandra Ríos (A Pobra) e Laura Martínez (Riveira).
- Na embarcación de Donostiarra estaban remando Ángela Castro (A Guarda), Natalia Tubío (Boiro) e Laura Alonso (Ferrol).
A enseada do Orzán acolleu onte e hoxe (sábado e domingo) as dúas xornadas do trofeo Bandeira Cidade da Coruña de traiñeiras, no contexto da terceira e cuarta xornada dos calendarios da a Eusko Label Liga e a Euskotren Liga de traiñeiras.
Noa, Vicky e Andrea, as tres galegas de Orio
Na xornada de domingo, a primeira das regatas, que puxo en xogo a V Bandeira Cidade da Coruña entre as catro tripulacións da Euskotren Liga, comezou ao mediodía coa embarcación de Orio Orialki como o rival a bater, líder tras a primeira xornada. Nese barco vogan tres remeiras galegas: Noa Viaño (Redondela), Vicky Piñeiro (Cangas) e Andrea Oubiña (O Grove).
Na de hoxe, Donostia Arraun Lagunak quedou en primeiro lugar (10:56.70). Neste barco tamén hai deportistas galegas. En concreto, Cristina Simoes (Vigo), Beatriz Piñeiro (Cangas), Alejandra Ríos (A Pobra) e Laura Martínez (Riveira).
A traiñeira de Donostia Arraun Lagunak chegou a meta seguida de preto por Orio Orialki, gañadora final da V Bandeira Cidade da Coruña aproveitando o bo resultado colleitado onte, que permitiu á tripulación de Orio ser a vencedora final desta fin de semana na Coruña, con cinco segundos de vantaxe sobre Donostia.
A participación galega feminina nesta proba completábase coas remeiras da embarcación de Nortindal Donostiarra UR Kirolak na que estiveron remando na bahía herculina Ángela Castro (A Guarda), Natalia Tubío (Boiro) e Laura Alonso (Ferrol).
VI Bandeira Cidade da Coruña masculina para Bermeo Urdaibai
Posteriormente, as tripulacións masculinas comezaron a súa loita definitiva pola VI Bandeira Cidade da Coruña, que confirmou a Bermeo Urdaibai como a gañadora, tras dar o primeiro paso cara a vitoria este sábado, na primeira xornada.
Cun tempo final de 20:10,88, Bermeo deu continuidade ás boas sensacións de onte e alzouse tamén hoxe co triunfo, por riba da embarcación de Amenabar Donostiarra Ur Kirolak 100 (20:12,70) e Matrix Hondarribia (20:15,34). Os representantes galegos na competición, o Club de Remo de Ares (20:38,50) e o Club de Remo Cabo de Cruz (20:50,96), remataron no décimo e décimo segundo posto.
O concelleiro de Relacións Institucionais, Turismo e Seguridade Cidadá do Concello da Coruña, Juan Ignacio Borrego, e a concelleira de Deportes, Mónica Martínez, participaron no acto de entrega das bandeiras ás embarcacións gañadoras, que despediu esta fin de semana da liga de traiñeiras na cidade, na que foi a primeira parada do torneo en Galicia no contexto desta tempada.
A competición volverá o vindeiro ano á cidade da Coruña, en virtude do acordo de colaboración establecido entre o Concello da Coruña, a través do Consorcio de Turismo e Congresos, e a a Asociación de Clubes de Traineras (ACT).
