O tempo acábaselle ás xogadoras do Ulla Oil Rosalía para lograr a permanencia. As galegas son colistas, pero esta fin de semana enfróntanse á ADBA, rival directo na táboa. O partido será este sábado, 13 de febreiro, ás 17:00 horas.
“Probablemente será o partido máis importante do tramo final de Liga”. declara Blanca Manivesa, a sete das brancas. Previsiblemente, esta será a última gran oportunidade das galegas para depender de si mesmas e evitar o descenso de categoría. Con 28 puntos, as compostelás son o farolillo vermello e acumulan cinco derrotas consecutivas.
A última delas foi a causante desta posición. O Rosalía non foi capaz de manter a raia ao Magec Tías, polo que canarias e galegas intercambiáronse posicións.
O Rosalía baixa á posición de colista tras a quinta derrota consecutiva (70-61)
Tamén cinco xornadas sen vencer acumulan na ADBA. As asturianas son 13ª, tamén con 28 puntos e só están un posto por riba das galegas por ter gañado o basket average.
Jesús Montero, adestrador axudante, destaca a importancia de recuperar este average e de gañar sumando o máximo de puntos posibles, en caso de triplo empate ao final.
Jesús Montero: “Quen sexa capaz de manter a calma e estar concentrado nos momentos decisivos, levarase a vitoria”
O técnico prevé este encontro como unha “batalla física e mental. Un partido no que, quen sexa capaz de manter a calma e estar concentrado nos momentos decisivos, levarase a vitoria. Un partido centrado nos detalles e que se via decidir no final”, advirte. Manivesa concorda e cre que será un encontro “moi intenso e duro”.
A vitoria da ADBA na ida sobre o Rosalía sitúa as galegas en descenso
O partido da primeira volta enfrontou a ADBA e Rosalía na pista das asturianas. Aquel foi un encontro moi igualado durante os 40 minutos. Un mal comezo das brancas non sentenciou o partido, xa que as xogadoras de Chiqui Barros loitaron pola remontada.
Case o conseguiron no segundo cuarto, situándose a un punto das locais e deixando o partido aberto para a segunda metade. Nesta, estiveron sempre á sobra da ADBA, pero finalmente as asturianas venceron por só dous puntos.
O basketaverage a favor é o factor que explica que as asturianas evitan polo de agora a posición do descenso. Atendendo aos datos globais da tempada, as que serán visitantes nesta xornada encaixaron 1514 puntos polos 1188 anotados. Números peores que os das galegas, con máis acerto anotador (1300 puntos) e similar coas canastras encaixadas (1511 puntos).
Co precedente da primeira volta, e as estatísticas de ambos conxuntos, o Instituto Rosalía acollerá un encontro igualadísimo, no que locais e visitantes se xogan a vida e que determinará o futuro da Liga Feminina 2.
As asturianas xogarán despois contra o Arxil e finalizarán a tempada coa AD Cortegada. Rivais máis adquiribles que os das galegas. O Rosalía competirá na penúltima xornada contra o Osés Construcción Ardoi, segundo clasificado, e a última contra o BAXI Ferrol, líder invicto. Por iso, esta pode ser a última bala na recámara das compostelás.
