O obxectivo primordial desta primeira volta da liga Iberdrola para o CRAT Residencia Rialta, non é outro que quedar entre o catro primeiros lugares. Son eses postos de privilexio os que outorgan a que os ocupa o billete a unha segunda fase na que se pelexará polo título de liga. Nesa loita por estar no cuarteto de elexidas, o partido desta fin de semana ante Lles Abelles é crucial para as galegas. O partido terá lugar o sábado 20 de marzo ás 16:00 horas no campo de Elviña na Coruña.
A situación actual da clasificación lembra á da pasada tempada, con catro clubs en apenas uns poucos puntos que pelexarán por tres destas prazas.
Todas as opcións do CRAT Residencia Rialta para levar unha desas prazas pasa por vencer ao seu rival mañá (sábado 20) pola tarde en Elviña. Neste momento da competición na Liga Iberdrola, as galegas están inmersa na pelexa por esos postos desexados. Ocupan a quinta posición. E as súas opcións para subir á cuarta praza, pasan por obter unha vitoria ante o conxunto valenciano de Lles Abelles, que é o pechacancelas da clasificación e que conta os seus partidos (cinco) por derrotas.
Lles Abelles son colistas pero non serán un rival doado para o CRAT
A pesar do que puidese parecer mirando a clasificación, as coruñesas non esperan atoparse un rival para nada sinxelo este sábado en Elviña. As levantinas son un conxunto moi a ter en conta e, salvo na primeira xornada onde estaban a se aclimatar á liga Iberdrola tras o seu recente ascenso, en ningún encontro cederon sen plantar unha dura batalla aos seus rivais, facéndolles en moitos casos pasar apuros até o asubío final.
As coruñesas chegan moi concentradas á cita conscientes da dificultade e a importancia do encontro. Tras dúas semanas completas de adestramentos sen sobresaltos, algo case noticiable nesta tempada, as pupilas do dúo de adestradores que conforman Helen Roca e Jos Porto, esperan que se poida seguir vendo no campo toda a fortaleza defensiva mostrada até a data. Tamén confían no club galego en acadar, tras o traballo das última semanas, unha importante melloría nos aspectos menos depurados do xogo co oval.
