O seu debut olímpico nos Xogos de Tokio serán (se nada cambia) a gran cita deste ano para Ana Peleteiro , pero un paso decisivo cara a esa meta na súa carreira terá lugar hoxe, venres 29 de xaneiro. Despois de once meses, a atleta galega volve ás pistas para competir. Esta será, polo tanto, data marcada no calendario da do Barbanza desde hai tempo. Nesta ocasión, a triplista formará parte das deportistas que entrarán en concurso na apertura do World Indoor Tour na cidade alemana de Karlsruhe, a partir das 19:15 horas.
Esta competición do Circuíto Mundial Baixo Teito 2021 será a primeira das cinco probas de atletismo que completan o torneo. As seguintes serán en febreiro, comezando o 9 en Liévin, (Francia), o 13 en Boston (Estados Unidos), o 17 en Torun (Polonia) e o 24 en Madrid.
Esta localidade alemana pode ser un talismán para Peleteiro. A derradeira vez que pisou as súas pistas para competir, no ano 2019, venceu cun salto de 14,51 metros, no que foi o inicio dun gran curso. Un mes despois proclamouse campioa europea no Campionato de Glasgow, onde ademais logrou bater o récord de España. Os próximos retos van todos enfocados aos Xogos Olímpicos de Toquio deste verán.
As rivais de Peleteiro
Para a proba de Karlsruhe dúas atletas son firmes competidoras da galega para competir polo ouro. Trátase de Paraskevi Papahrístou, unha atleta grega que chega á competición como a mellor segundo o seu palmarés, e de Kristiina Mäkela, finlandesa que foi finalista no mundial de Doha.
Pero o maior reto de Peleteiro non serán as outras atletas, senón volver a competición despois dunha pandemia e tantos meses desde o último torneo. Este foi o 29 de febreiro do 2020, no Nacional Baixo Teito celebrado en Ourense.
Para preparar a competición indoor deste venres, a galega leva tres semanas adestrando no sur de Portugal, centrándose en perfeccionar a súa técnica. Isto permitiralle chegar en boa forma física, pero non disipa os nervios previos á competición.
“Non vos podedes imaxinar as ganas que teño de volver ás pistas. Estou como un flan”, declaraba Ana Peleteiro no seu perfil de Instagram.
Ver esta publicación en Instagram
