O HC Deportivo Liceo visita a pista do Lidergrip CH Mataró (Municipal Jaume Parera i León) mañá sábado ás 20:30 horas na OK Liga. Aló vai á procura da súa segunda vitoria consecutiva. Coa clara idea de sumar tres puntos.
Na pasada xornada as liceístas vencían na xélida pista madrileña do CP Las Rozas (1-4). Ese partido xogouse o mércores. Case sen tempo de recuperación, as verdibrancas xogarán o seu terceiro partido da semana ante o CH Mataró.
Será o penúltimo do ano 2021 para o equipo que adestra Stanis García. O HC Deportivo Liceo marcha oitavo na táboa con sete puntos no seu haber froito de dúas vitorias e un empate. En fronte terán as patinadoras que adestra Aleix Castellsaguer. O Lidergrip CH Mataró vai duodécimo (terceiras pola cola) na clasificación da OK Liga feminina. So gañaron un partido e perderon cinco.

A necesidade apremiará as ganas do conxunto local, necesitado de triunfos e de regalar unha vitoria á súa afección.
De feito, o único partido que gañaron foi fóra de casa, na pista do Garatge Plana Girona CH na segunda xornada (0-3). Caeron co Cerdanyola CH Feníe Energía (0-4), Generali HC Palau de Plegamans (0-6), Igualada Femení Grupo Guzmán (4-1), CP Las Rozas (3-5) e na última xornada co CP Vila-Sana (8-0). Salvo no caso do CP Las Rozas, todos equipos contra dos que entra na lóxica que o Lidergrip CH Mataró poida perder.
É dicir, que as rivais do equipo coruñés teñen unha puntuación bastante aquelada con respecto aos rivais contra os que lle tocou loitar na pista. De aí que o partido contra o Liceo poida ser para elas, un revulsivo, un punto de inflexión no que ir cara arriba e empezar a gañar.
Na lista de xogadoras convocadas de Stanis García atópanse esta semana as seguintes deportistas: Viki Caretta, Katy Guscin, como porteiras, e María Sanjurjo, Alba Garrote, Adriana Soto, Bea Gaete, Lucía Yáñez, Naiara Vaamonde e Ale Martín, como xogadoras de pista.

Resultados da 6ª xornada da OK Liga 2021-22
- Martinelia CP Manlleu 6-1 Garatge Plana Girona CH
- CP Vila-Sana 8-0 Lidergrip CH Mataró
- Telecable HC 3-2 PHC Sant Cugat
- Cerdanyola CH Feníe Energía 3-1 CP Voltregà Stern Motor
- Generali HC Palau De Plegamans 9-0 CP Vilanova
- CP Las Rozas 1-4 Deportivo Liceo
- Orkla-Bigues i Riells 3-1 Igualada Femení Grupo Guzman