A Selección Galega de Judo viaxou a Portugal para disputar a Cadet International Cup de Coimbra cunha ducia de judokas. Alí, o balance das deportistas galegas rematou con dous ouros, unha prata e cinco bronces.
Para este torneo, o equipo galego partía cunha desvantaxe importante. Debido ás restriccións COVID os adestramentos dos últimos meses non se puideron desenvolver con normalidade, xa que non estaba permitido o contacto. Non foi así noutros países participantes neste campionato.
Porén, as nosas judokas conseguiron sobrepoñerse ás dificultades e demostrar un gran nivel subindo en oito ocasións ao podio.
Oito medallas para as judokas galegas
Na primeira xornadada competición, ata catro deportistas galegas lograron subirse ao podio. Malena Castro proclamouse campioa nos 48 kg e, no mesmo peso, a galega Marta Gaitero colgouse o bronce.
Nos 52 kg da primeira xornada a fórmula galega repetiuse cun ouro e un bronce. O primeiro deles foi para Inés Villahoz, mentres que a terceira posición quedou para Belén Ferreiro.
Na segunda xornada competitiva o judo galego non obtivo ningún ouro en categoría feminina, pero seguiu sumando premios no medalleiro. Lucía Pazos acadou a prata nos 57 kg, mentres que Alicia López chegaba á quinta posición do mesmo peso. Pola súa parte, Marina Gómez, Noa González e June Moreno lograban un bronce cada unha en 63 kg, 70 kg e +70 kg respectivamente.
Podes revivir aquí o último combate de June Moreno, na canle do seu club, a AD Judo Ferrolterra:
