Ata a pasada xornada, os rivais madrileños non eran problema para o Autos Cancela Zalaeta. As coruñesas venceron a Futura Center Arena Rivas e CV Torrejón pero caeron ante o VP Madrid. Esta fin de semana repiten orixe das rivais xa que as súas contrincantes son de Madrid, neste caso, o Leganés, nunha cita prevista para o sábado, 13 de febreiro, ás 19:00 horas no Barrio das Flores.
Este encontro promete ser un espectáculo do voleibol feminino español. Aínda que as madrileñas están mellor situadas, só seis puntos as separan das galegas, estando as primeiras na terceira posición e as segundas na quinta da Superliga Femenina 2 (SF2). Unha diferenza provocada polos tres trunfos de máis que leva o Leganés.
Aínda así, as visitantes para esta cita chegan dunha derrota en Torrelavega, nun partido perdido no tie break e dunha vitoria contra o RGC Covadonga, tamén xestada na morte súbita.
Por iso, previsiblemente, cheguen ao fortín coruñés con gañas de redimirse e asinar unha vitoria contundente, como a que lograron na ida contra o Zalaeta. No partido da primeira volta, as herculinas perderon por un 3-0, un resultado ao que intentarán darlle a volta nesta nova xornada.
Cunha vitoria dun pleno de sets, o Zalaeta sería quen de reducir á metade a distancia co Leganés, achegándose moito ao podio da categoría de prata.
Este partido poderá verse vía streaming no Youtube do Zalaeta.
Guzzi, do Zalaeta, mellor bloqueadora da última xornada
A última derrota, sufrida ante o líder da SF2, o VP Madrid non foi por desmérito coruñés. O bo xogo das entón visitantes non foi suficiente para vencer ás invencibles, pero xogadoras como Eleonora Guzzi deron mostra da súa grandeza.
A xogadora do Zalaeta ven de ser elixida pola RFEVB como mellor bloqueadora da xornada, con seis bloqueos en catro sets contra as madrileñas.
No cómputo xeral deste curso, Guzzi sitúase como a novena mellor xogadora, cun total de 29 bloqueos.
