Algo máis dun mes ten que esperar a afección do Autos Cancela Zalaeta para volver a ver ás xogadoras na pista. A súa volta á Superliga Femenina 2 (SF2) de voleibol será este sábado, 23 de xaneiro, ás 20:00 horas, contra o Futura Center Arena Rivas, na casa das madrileñas.
O retorno ás pistas será unha oportunidade de ouro para que as galegas sumen tres puntos da vitoria. Actualmente, o Zalaeta ocupa a sétima posición da táboa clasificatoria, tras sumar catro vitorias e seis derrotas en dez partidos xogados.
As coruñesas sitúanse, con 14 puntos, a seis das terceiras clasificadas, o CV Leganés. De vencer nesta décimo terceira xornada, sería a primeira vez que as galegas se reencontran coa vitoria. As herculinan non gañan desde o pasado 28 de novembro, cando venceron cun 3-2 ao Torrelavega.
Desde entón, as galegas caeron ante o Covadonga, Extremadura Arroyo e CV Sestao. Este foi o duelo co que pecharon, no Barrio de las Flores, o 2020.
O ano comeza ante o colista
Para este reencontro coa competición regular, as xogadoras do Zalaeta enfrontaranse ao colista do grupo A da SF2. O Arena Rivas só foi quen de asinar unha vitoria de tres puntos e unha de dous, ademais de rascar un punto nunha derrota. Así, no que vai de tempada, sitúanse no último posto con 6 puntos.
No seu último partido, ante o Arona Tenerife Sur, as madrileñas sufriron unha derrota por un 3-2. O duelo celebrouse o pasado 12 de decembro, e as xogadoras levan sen competir na liga regular desde entón.
Claros e escuros da xornada de descanso do Zalaeta
Un mes sen xogar pode supoñer unha vantaxe ou un verdadeiro hándicap para o rendemento dun equipo. No caso do Zalaeta, as herculinas levan desde o 19 de decembro sen xogar, ao ter xornada de descanso no inicio da segunda volta ligueira tras o parón de Nadal.
Segundo o adestrador do conxunto galego, Jorge Barrero, este ‘tempo extra’ “se ben implica perder ritmo de xogo, tamén un parón tan longo permite facer de novo traballo de “pretempada”, co que mellorar o rendemento físico das xogadoras e tocar aspectos técnicos e tácticos cos que chegar en bo estado de forma a esta segunda volta”.
Como parte desta segunda ‘pretempada’, tres xuvenís foron convocadas aos adestramentos. Carlota Vivaz, Lucía Ferreiro e Iria poderían debutar co cadro herculino nesta segunda volta.
A pausa non cambia o seu obxectivo: gañar todo o posible para subir na clasificación. O resultado, haberá que velo esta fin de semana, na viaxe das coruñesas a terras madrileñas. O partido poderá verse no streaming do Youtube do Zalaeta.
