De novo, un rival competitivo para o Autos Cancela Zalaeta. A dous partidos da fin da primeira volta, as coruñesas viaxan para xogar contra o Extremadura Arroyo, o sábado, 12 de decembro, ás 18:00 horas.
Cuns resultados parexos, galegas e extremeñas chegan á décima xornada da Superliga Femenina 2 de Voleibol separadas por seis puntos. Dúas vitorias máis (e de tres puntos) para o Extremadura Arroyo sitúanas na terceira posición, acadada tras perder a primeira ante o actual lider, o VP Madrid, 1-3.
Tamén dunha derrota, 3-1, chegan as xogadoras do Zalaeta. O cadro de Jorge Barrero non anguantou ben o ritmo do encontro e foi de máis a menos no partido contra o RGC Covadonga.
Precisamente contra este rival foi a última vitoria do Extremadura, cun contundente 0-3. As extremeñas foron superiores tanto nos ataques coma nos bloqueos, cun rol moi importante das centrais, que decidiron o partido.
Alternancia de vitorias e derrotas entre Zalaeta e Extremadura
Ambos conxuntos enfrontáronse por primeira vez na tempada do 2012/2013. Aquel curso a vitoria foi para o Extremadura e tiveron que pasar cinco anos para que se volvera celebrar un partido entre os dous equipos.
Na 17/18 ambos volveron estar moi igualados, cunha vitoria para cada un. No curso do 2018/2019 os dous equipos chegaron á fase de ascenso SF2. Desde entón, galegas e extremeñas disputaron cinco partidos, con resultados moi variados.
As que serán locais nesta xornada gañaron en tres ocasións, dúas delas seguidas no paso da tempada 18/19 á 19/20. Porén, a última vitoria foi para as coruñesas cun claro 3-0.
Un resultado que sen dúbida buscarán repetir nun partido que é unha final, contra un rival da súa liga. O sábado, a afección do Zalaeta poderá vivir o que será un encontro moi igualado cun voleibol de alto nivel e que pode decidir o futuro do cadro galego.