Neste tramo final da Superliga Femenina 2 (SF2) unha nova xornada leva ao plantel do Autos Cancela Zalaeta a desprazarase a Cantabria. Alí as coruñesas xogarán o sábado, 6 de marzo, ás 18:00 horas, contra o Torrelavega 1895, un rival do seu nivel.
Este será un encontro previsiblemente igualado, entre dous equipos que ocupan a zona media da táboa. As locais ocupan a sétima posición cun punto e un partido máis que as galegas, que con 20 puntos están no oitavo posto.
Este será o último partido do Torrelavega como locais e regresan a casa despois dunha derrota ante o Covadonga por un 3-1. Tamén dun partido perdido chegan no Zalaeta, no seu caso ante o Arona Tenerife Sur.
Porén, as cántabras só levan unha racha de dúas derrotas consecutivas, sendo a súa última vitoria a do 13 de febreiro ante o Arona Tenerife Sur. No bando galego, o útlimo trunfo xestouse o 30 de xaneiro, ante o CV Torrejón.
Este encontro retransmitirase vía streaming no Facebook do Torrelavega.
Os precedentes do Torrelavega – Zalaeta
Cántabras e galegas son vellas coñecidas. Esta non será a primeira vez que se citan sobre a pista e o enfrontamento Torrelavega – Zalaeta é xa un clásico da SF2.
O último encontro entre estes dous equipos tivo lugar no Barrio das Flores, nun igualadísimo duelo que tivo que decidirse no tie-break. O resultado (3-2) foi favorecedor para as galegas.
E mesmo marcador tivo o anterior encontro, correspondente ao único partido da tempada 2019/2020 que puideron disputar entre si, celebrado tamén na Coruña.
Remontándonos xa á tempada 2018/2019, o gañador da volta foi para o conxunto cántabro, que venceu por un 1-3. Na ida desde mesmo curso as herculinas venceron outra vez por un 3-2.
En total, dos 17 enfrontamentos entre Zalaeta e Torrelavega que tiveron lugar desde o 2012, en 12 ocasións o cadro coruñés foi o gañador.
Marzo, o “mes” das coruñesas
Despois dun febreiro negro que non deixou ningún punto, as herculinas queren estrear mes con mellor sabor de boca. No próximo mes, o Zalaeta disputará catro partidos: Torrelavega, Covadonga, Extremadura Arroyo e Sestao.
Catro citas nas que as coruñesas irán a pola vitoria, ante rivais da metade superior da táboa. Todo un reto para un equipo que quere rematar a tempada o mellor posible e recuperar a confianza no seu xogo.
