O Autos Cancela Zalaeta está en medio da fase madrileña da competición, e semella que os rivais de Madrid dásenlle ben ás galegas. Despois de vencer a Futura Center Arena Rivas e CV Torrejón (ambos cun pleno de sets), as coruñesas visitan ao líder, o VP Madrid. O encontro celebrarase no CDM Entrevías o próximo domingo, 7 de febreiro, ás 12:00 horas.
As xogadoras de Jorge Barrero chegan nun gran momento a este partido. O CV Zalaeta aínda non coñece a derrota neste ano 2021, e as dúas últimas vitorias que acadaron permitíronlle escalar tres postos na clasificación da Superliga Femenina 2 (SF2) de voleibol.
Porén, súa imbatibilidade destas últimas xornadas periga. As coruñesas visitarán esta fin de semana ao VP Madrid, todo un reto, xa que as madrileñas son as líderes da categoría con 13 de 13 trunfos.
Este posto foi conseguido a través dun xogo cun bloque cohesionado e que case non concede erros. Ademais, teñen entre as súas filas á segunda máxima anotadora da categoría na posición de oposta.
O Zalaeta, un paso máis preto do ascenso
O cambio de ano sentoulle ben ás galegas. Se en decembro non lograban sumar puntos, nun mes no que o Zalaeta só rascou un punto na derrota ante o CV Sestao, todo cambiou en xaneiro.
Tras o parón de Nadal, o equipo recargou pilas e desconectou para volver con moita forza ás pistas. O ano comezaba coas herculinas na sétima posición, e case un mes despois, ocupan xa a cuarta.
Agora, o Zalaeta acumula no seu haber vinte puntos, grazas ao equilibro entre seis vitorias e seis derrotas. Este casilleiro sitúanas a 16 puntos das primeiras clasificadas e próximo rival das coruñesas.
O reto de vencer ao líder
O VP Madrid é, sen dúbida, un dos claros favoritos ao ascenso a Liga Iberdrola. Ata o momento, as madrileñas non coñecen a derrota. Só concederon puntos a tres equipos: RCG Covadonga, Futura Center Arena Rivas e o propio Zalaeta.
Galegas e madrileñas xogaron na cuarta xornada, nun partido moi disputado e no que se chegou ata o quinto set para decidir quen merecía a vitoria e saía gañador. As galegas asinaron un mal primeiro set, pero recompuxéronse con éxito na segunda manga e pelexaron o resultado ata o tie break.
Coa confianza que da chegar en bo estado de forma, e o precedente que case remata en vitoria, as xogadoras que adestra o técnico Jorge Barrero teñen posibilidades de gañar ás invictas.
Todo vaise decidir este domingo en terras madrileñas. Será, se dúbida, nun duelo de alto nivel na segunda mellor categoría do voleibol español.
Guzzi e Quirós, entre as mellores da xornada
Outra baza a favor das coruñesas do Autos Cancela CV Zalaeta é o talento das súas xogadoras. Na última xornada destacaron dous dentro do plantel: Eleonora Guzzi e Alba Quirós.
A primeira foi recoñecida como a mellor bloqueadora da 14ª xornada da Superliga 2, con catro bloqueos gañadores e a segunda é a terceira mellor sacadora, con seis saques vencedores.
Ambas estarán na convocatoria desta fin de semana, xunto ás outras 12 xogadoras incluíndo ás xuvenís habituais: María, Carlota e Iria.
🔝💥AS MELLORES DA XORNADA💥🔝 pic.twitter.com/dXJAtRGVNS
— Club Voley Zalaeta (@CVZalaeta) February 3, 2021
