O Autos Cancela Zalaeta comeza a acusar o cansancio dunha competida tempada e nos últimos encontros tivo problemas ata para levarse os sets. Malia estar nunha posición cómoda, isto debe cambiar e a primeira ocasión para facelo será ante o Arona Tenerife Sur. O partido celebrarase no Barrio das Flores o sábado, 27 de febreiro, ás 19:00 horas.
Un rival en principio adquirible para as galegas, xa que as canarias ocupan a penúltima posición e só foron capaces de vencer en catro (un de tres puntos e tres de dous) de quince partidos. Así, o Arona Tenerife Sur suma 11 puntos, cun balance de 21 sets a favor e 40 en contra. Con este dato son o conxunto que máis sets encaixa en contra da competición.
Nove puntos por riba, e con dúas vitorias máis (pero cinco de tres puntos e unha dun punto), está o Zalaeta. As coruñesas destacan polo seu balance entre sets a favor e en contra, con 27 dos primeiros e 29 dos segundos, o que explica a súa posición no medio da táboa.
Febreiro, mes negro na Coruña
Con todo, o equipo da Coruña quedou conxelado nos 20 puntos neste mes de febreiro. As herculinas non puntuan desde a 14ª xornada de Superliga Femenina 2 (SF2), cando ocupaban a cuarta posición. Desde entón, con tres derrotas consecutivas, o Zalaeta baixou á quinta na 15ª, e á sétima na 16ª, onde se mantiveron na 17ª.
Coa derrota sufrida na anterior xornada ante o Sanse as madrileñas achegáronse perigosamente ao Zalaeta, separadas agora por só dous puntos.
As coruñesas non foron entón capaces de vencer a un rival peor na clasificación, pero que sobre a pista non lle deu a oportunidade de asinar nin un só set. Isto debe ser unha lección para as de Jorge Barrero, que non poden confiarse ante un conxunto presumiblemente dun nivel máis baixo.
O Zalaeta xa caeu ante o Arona
Ademais, o Arona xa foi quen de gañar ás galegas na primeira volta. Sorprendentemente, as canarias foron quen de remontar un partido que comezaron gañando e que se iría ata o tie break para decidir vencedor.
As de Barrero foron as superiores no segundo e terceiro set, recuperándose dun mal inicio de duelo, pero para o cuarto tempo o Arona retomou o control. Pouco puido facer o Zalaeta nunha morte súbita que se decidiu cun 15-6.
Para esta ocasión, as herculinas deberán traballar na súa concentración desde o minuto un de partido e en evitar os erros que poidan colocar por diante ao rival.
O fortín das coruñesas abrirá as portas de novo con aforo limitado. Para poder acceder ao partido débese enviar un correo ata as 12:00 horas do sábado á dirección adminitracion@voliebolzalaeta.gal. O correo debe incluír os datos e das persoas da mesma unidade de convivencia que vaian asistir.
