O Autos Cancela Zalaeta pecha o ano 2020 cunha derrota ante un rival directo, o CV Sestao. O partido estivo moi igualado entre dous equipos cun nivel similar e que chegaban case á par na táboa á fin da primeira volta. O resultado final foi 2-3 ao ter que ser resolto o encontro no tie break. Proba, unha vez máis, da igualdade entre as dúas plantillas.
Antes desta undécima xornada de Superliga Femenina 2 (SF2) de voleibol os dous conxuntos chegaban ocupando a sexta e a quinta praza. Cun punto máis, as visitantes partían cunha lixeira vantaxe que aumentaron á fin do duelo.
“Non estamos a xogar mal e, a pesares dos resultados, nos últimos partidos estivemos aí en todo momento: faltounos un punto, que está na nosa man mellorar de cara ao 2021”, declarou o técnico das coruñesas, Jorge Barrero, tras o partido.
Jorge Barrero, técnico do equipo coruñés, amósase optimista: “Non estamos a xogar mal e, a pesares dos resultados, nos últimos partidos estivemos aí en todo momento: faltounos un punto, que está na nosa man mellorar de cara ao 2021”
O Zalaeta perde nos últimos sets
O CV Sestao saíu moi centrado á pista e logrou facerse cos primeiros minutos de xogo. Porén, o cadro dirixido por Jorge Barrero reaccionou e impediu que as vascas se alonxasen no electrónico. Así, con moita igualdade no terreo de xogo, o primeiro tempo decidiuse cun 22-25.
Para o segundo set, as coruñesas do CV Zalaeta deron un golpe enriba da mesa e fixéronse co control do partido. Un contundente tanteo de 25-16 colocaba o encontro do lado local. A terceira manga volveu estar moi igualada, pero unha lixeira vitoria das galegas (por 25-23) parecía indicar que os puntos quedarían na casa.
No cuarto set, o Sestao asinou unha moi boa racha de saque-defensa mediante o K2 e dominando o ataque 4 co bloqueo, forzaron un tie break para resolver o encontro.
No tempo de desempate, a vitoria parecía cambiar de bando e quedar coas visitantes cun bo parcial das de Paki Blanco, de 2-8. O Zalaeta non baixou os brazos e, coa entrada de xogadoras como Laura Vázquez e Claudia Gómez, e dous aces seguidos de Carla Figueroa, volveron a meterse no partido.
Con todo, finalmente, as vascas lograron levarse o encontro cun 13-15 no tempo final grazas a dous erros das locais e un bloqueo e punto directo da Ohiane Gutiérrez.
As Ohiane, o pesadelo do Zalaeta no equipo rival
Malia o mal comezo de partido que asinaron as visitantes, as dúas máxima anotadoras da cita estiveron do seu lado da pista: Ohiane Guitiérrez, con 25 puntos, e Ohiane Paskual, con 20.
No bando local, destacaron as actuacións anotadoras de xogadoras como Alba Quirós, que asinou un total de 20 puntos, seguida por Carla Figueroa, con 18, e Eleonora Guzzi, cunha tarxeta de 16 no seu saldo particular. O propio club tamén quixo destacar o traballo en bloqueo do equipo, logrando desta forma 14 puntos, cinco deles grazas a Cristina García.
O partido disputouse ante público cun aforo limitado por mor das restriccións que marcan os protocolos de prevención do contaxio da COVID-19 en recintos deportivos. Pero puido seguirse a través da canle de Youtube do Zalaeta.
Ver esta publicación en Instagram
FICHA TÉCNICA
AUTOS CANCELA ZALAETA: Cristina García, Alba Quirós, Eleonora Guzzi, Laura Vázquez, Carla Figueroa e Susana Suárez -sexteto inicial-. Tamén xogaron: Patricia Santos, Claudia Gómez, María Forteza e Noemí Sánchez (líbero).
CV SESTAO: Nerea Izaguirre, Ane Briz, Oihane Gutiérrez, Oihane Paskual, Nerea Ruíz e Karlijn Verwiej -sexteto inicial-.Tamén xogaron: Ziortza Tejedor (líbero), Maider Lorenzo e Nerea Ugalde.
PARCIAIS POR SETS: 22-25 / 25-16 / 25-23 / 23-25 / 13-15 (2-3).
ÁRBITRO: Alberto Cordeiro e Juan Carlos Liste.
INCIDENCIAS: Partido da undécima xornada na Super Liga Feminina 2 disputado no polideportivo do Barrio das Flores na Coruña.
