O Autos Cancela Zalaeta perdeu a boa racha na que estaba nas últimas dúas xornadas, pero os malos resultados deportivos non empañan o convencemento das galegas. O equipo coruñés buscará reencontrarse co trunfo este domingo, 21 de febreiro, ás 13:00 horas visitando ao Voley Sanse Live Vuvuzela.
De novo, as herculinas teñen a un rival madrileño enfronte. A comunidade de Madrid ten moita representación na Superliga Femenina 2 (SF2) e o propio Zalaeta soubo vencer a varios dos seus equipos.
As coruñesas foron mellores que o Futura Center Arena Rivas e CV Torrejón pero caeron ante o VP Madrid e o Leganés.
Haberá que agardar ata esta fin de semana para ver como se lle da un rival, a priori, de menor nivel que elas. O Sanse chega na antepenúltima posición, como o segundo equipo que máis sets en contra sufre, cun total de 32 fronte aos 20 que leva a favor. Ademais, os seus catro partidos gañados, fronte aos dez perdidos (malia obter tres puntos en tres deles), as deixan con 15 puntos.
Cinco máis teñen no Zalaeta, que leva un saldo de seis vitorias por oito derrotas e as sitúa na sétima praza. Porén, o seu rival chega en boa forma, despois de gañar a un rival directo, o RGC Covadonga, cun contundente 0-3.
Ao seu favor, as coruñesas teñen o recordo da vitoria lograda na primeira volta competitiva, onde se impuxeron na cancha do Barrio das Flores cun 3-0.
