A novena xornada de Superliga Femenina 2 de Voleibol prevía un encontro moi igualado entre o RCG Covadonga e o Autos Cancela Zalaeta. E así foi. Foron necesarios catro sets para coñecer ao gañador do partido, que foi o cadro local, cun 3-1 final.
As coruñesas asinaron un bo encontro a nivel competitivo, lideradas por Alba Quirós, logrando sumar o punto do primeiro set do encontro. A partir de entón, as visitantes baixaron a guardia e o cadro asturiano puido comezar a remontada.
No segundo set, as locais aventaxáronse no marcador e déronlle a volta ao resultado do primeiro set, logrando desta vez un 25-21 ao seu favor. Un resultado que se repetiu no terceiro set, inclinando xa a balanza do lado local.
O partido rematou por decidirse no cuarto tempo, cando o Zalaeta apretou un pouco máis e sumou algún punto máis que nos tempos anteriores, pero non foi suficiente para forzar un quito set pola vitoria.
Finalmente, os tres puntos quedaron en Asturias e as coruñesas visitarán ao Extremaduro Arroyo na seguinte xornada.
FICHA TÉCNICA
RCG COVADONGA: Marina Rubiera, Marina Blanco, Marta Fernández, Paula Lorenzana, Elena Rodríguez e Carla Margolles. Tamén xogaron: Miriam Diéguez, Ángela Rodríguez (líbero) e Sara García.
AUTOS CANCELA ZALAETA: Cristina García, Alba Quirós, Eleonora Guzzi, Laura Vázquez, Carla Figueroa e María Forteza. Tamén xogaron: Patricia Santos, Susana Suárez e Noemí Sánchez (líbero).
PARCIAIS POR SETS: 21-25 / 25-21 / 25-21 / 25-22 (3-1)
ÁRBITROS: Miguel Ángel Quiroga
INCIDENCIAS: Partido da novena xornada disputado no pavillón polideportivo Braulio García Gijón.
